Bir çox siyasi liderlər Qarabağın azad edilməsi və ölkəmizin bundan sonra da müstəqil dövlət kimi sabit inkişafını təmin etməyin yeganə yolunun Türkiyə ilə hərbi ittifaq sazişinin bağlanmasında görür. Amma aydındır ki, məsələnin belə qoyuluşu Şimal qonşumuzu qane etmir. Və ölkəmizdəki Rusiyapərəst qüvvələr mümkün qədər Azərbaycan-Türkiyə ittifaqının bağlanması, qardaş ölkənin ölkəmizdə hərbi bazalarının yaradılmasının qarşısını almağa çalışır...
Bəs tutaq ki, Türkiyə hərbi ittifaq barədə saziş bağlamadıq və bizim hərbi bloklara qoşulmamıza imkan verməyən Qoşulmama hərəkatından da çıxmadıq. O halda işğal altındakı torpaqlarımızın taleyi necə olacaq? Yenədəmi 30 ilə yaxındır ATƏT-in Minsk Qrupunun həmsədri olan Rusiya ilə danışıqlara ümid bəsləməliyik?..
Bu və digər suallarla bağlı Moderator.az-a açıqlama verən 1991-1992-ci illərdə Azərbaycan Respublikasının ilk Prezidenti Ayaz Mütəllibov tərəfindən yaradılmış Dövlət Müdafiə Şurasının üzvü kimi Türkiyənin Qarabağ savaşında ölkəmizə yardım məsələlərini təşkil edənlərdən biri kimi fəaliyyət göstərmiş Azərbaycan Milli İstiqlal Partiyasının lideri Etibar Məmmədov məsələyə bir az fərqli münasibət bildirib.
“Bilirsiz, ötən açıqlamalarda da vurğuladıım kimi, əsas məsələ Türkiyə ilə hərbi ittifaq barədə müqavilənin imzalanmasıdşır. Bununla bərabər hesab edirəm ki, məsələni “Türkiyə qal, torpaqlarımızı azad et” şəklində qoymaq da düzgün və məqsədəuyğun deyil. Çünki bizim dostumuz, qardaşımız olsa da, biz Türkiyə vətəndaşlarına və ya Türkiyə dövlətinə deyə bilmərik ki, gəlin, bizim əvəzimizdən müharibə edin, gəlin bizim əvəzimizdən Qarabağı azad edin. Birinci növbədə Azərbaycan özünün bütün hərbi və iqtisadi potensialıyla bu müharibəyə hazır olmalıdır... Azərbaycan vətəndaşları da, bizim əsgərlərimiz də həmin savaşda ön sıralarda dayanmalıdır...
Mən, qeyd etdiyiniz kimi, 1990-cı illərin əvvəlində, Qarabağ savaşının ilk günlərindən qardaş Türkiyənin yardımlarının lap başlanğıcında iştirak etmişəm... Və Türkiyə bu günədək onlardan istədiyimiz hər şeyi edib və bundan sonra da etməyə hazır olduğunu bildirir. Bunu son aylar Bakı, Naxçıvan, Gəncə, Kürdəmir və s. Azərbaycan şəhər və bölgələrindəki birgə hərbi təlimlərimiz, 15 sentyabr -Bakının Qurtuluşu günü münasibətilə Gəncə və Naxçıvanda birgə aviasiya uçuçları da təsdiqləyir.... Amma biz öz üzərimizə düşən vəzifəni birinci özümüz üçün aydınlaşdırmalı, hədəflərimizi müəyyənləşdirməliyik. Sonra da torpaqlarımızın azad edilməsi prosesində birgə necə iştirak edəcəyimizi hərbi müttəfiqlik sazişi əsasında ortalığa qoymalıyıq..."
“Tutaq ki, Türkiyə ilə hərbi ittifaq barədə saziş bağlamaq baş tutmadı və ölkəmizdə qardaş ölkənin bazaları yerləşdirilmədi. O halda Qarabağın taleyi necə olacaq? Yenədəmi 30 ilə yaxındır ATƏT-in Minsk Qrupunun həmsədri olan Rusiya ilə danışıqlara ümid bəsləməliyik?..” sualına cavabında isə partiya lideri belə deyib:
“Xeyr, Rusiya ilə danışıqlar aparmağın heç bir mənası və faydası yoxdur. Çünki bu prosesi yaradan da, onu gərginləşdirən də məhz Rusiyadır. Və Azərbaycan torpaqlarının işğalında da Rusiya bilavasitə iştirak edib. Ona görə də kimsə Rusiyadan nəsə gözləyirsə, bunun heç bir mənası yoxdur. Rusiya 300 ildir ki, Azərbaycana verdiyi sözlərin heç birini yerinə yetirməyib... Həmişə də müsəlman, türk dünyasına arxadan zərbə vurub... Və bundan sonra da belə davam edəcək. Ona görə də Ermənistanla dost olan Rusiya ilə dostluğa can atmaq - ölkəmizi düşməni ilə dost etməyə çalışmaq deməkdir...”
Sultan Laçın