Milli Məclisin həbsdə olan deputatı Eldəniz Səlimovun vəziyyəti yaxşıdır.
Bunu Modern.az-a açıqlamasında onun vəkili İlqar Əliyev deyib. Onun sözlərinə görə, deputat saxlanma şəraitindən razıdır.
15 gündür 8 nəfərlik kamerada saxlanılan parlamentarinin deputatlarla telefon əlaqəsi saxlamasına gəlincə, vəkil bu barədə məlumatsız olduğunu söyləyib:
“Vəziyyəti yaxşıdır. Deputatlardan onunla maraqlanan və ya görüşən olub-olmadığı barədə heç bir məlumatım yoxdur”.
Xatırladaq ki, iyulun 29-da Xaçmaz şəhərində yerləşən “Starıy Dvor” restoranında Milli Məclisinin deputatı Eldəniz Səlimovun polis əməkdaşına xidməti vəzifələrinin icrası ilə əlaqədar zor tətbiq etməsi barədə Daxili İşlər Nazirliyindən daxil olan material Baş Prokurorluqda araşdırılıb.
Toplanan material üzrə Cinayət Məcəlləsinin 309.2-ci (vəzifə səlahiyyətlərini aşma) maddəsi ilə cinayət işi başlanıb və istintaqın aparılması Baş Prokurorluğun İstintaq İdarəsinə tapşırılıb.
Milli Məclisin avqustun 3-də keçirilən növbədənkənar sessiyasının iclasında E.Səlimovun deputat toxunulmazlığına xitam verilib. Həmin gün Binəqədi Rayon Məhkəməsi onun barəsində 3 ay həbs qətimkan tədbiri seçib.
Eldəniz Səlimov Kürdəxanı İstintaq Təcridxanasında saxlanılır. Onun kamera yoldaşlarından biri “Müsəlman Birliyi” hərəkatının üzvü Razi Hümbətovdur.