“Ümumdünya Səhiyyə Təşkilatının avqustun 13-də Cenevrədə keçirilən brifinqində Mariya van Kerkxove belə fikir bildirib ki, COVİD-19-a təkrar yoluxma yoxdur və təkrar yoluxma halları haqqında bəzi ölkələrdən gələn xəbərlər öz təsdiqini tapmayıb”.
Bakısəsi xəbər verir ki, bu sözləri həkim allerqoloq-pulmonoloq Ramin Nəriman “Şərq”ə açıqlamasında bildirib. Onun sözlərinə görə, dünyada ilkin yoluxmadan aylar keçsə də, təkrar yoluxma faktı indiyədək təsdiq olunmayıb:
“İlkin yoluxmadan, yəni dekabr ayından 7-8 ay keçsə də, bu zaman kəsiyində təkrar yoluxma təsdiq olunmayıb. 10 aydan və ya 1-2 ildən sonra yoluxma hallarına rast gəlinə bilər. Bunu indidən demək mümkün deyil”.
Həkim-pulmonoloq əlavə edib ki, hər bir mikroorqanizmin yaşaması üçün mühit lazımdır: “Həmin mühitlər mikroorqanizmin yaşamasına imkan vermirsə, bu zaman onların həyatının davam etməsi də mümkün deyil. O cümlədən də koronavirusun pambıq olan mühitdə uzun müddət həyat qabiliyyətini saxlaması mümkün deyil. Bu, indiyə qədər aparılan bir çox mötəbər mənbələrin tədqiqatında öz təsdiqini tapıb”.
Həkim "pambıq paltarlar insanları koronavirusdan qoruyurmu" sualına da aydınlıq gətirib: “Bu çox yanlış fikirdir. İnsanlar pambıqdan alınmış parçadan maska düzəldib istifadə edə bilərlər. Amma o demək deyil ki, insanlar pambıqdan paltar geyinsə, qoruyacaq. Paltardan, qidadan yoluxma birmənalı şəkildə yoxdur.
Bu artıq Ümumdünya Səhiyyə Təşkilatının avqustun 13-də Cenevrədə keçirilən birifinqində də təsdiqlənib. Çində Braziliyadan, Argentinadan göndərilən minlərlə qida məhsulları üzərində tədqiqatlar aparılıb. Qidanın qablaşdırıldığı karton, plastik qablarda koronavirus aşkarlanıb. Onu satışa buraxan müəssisələrdə isə heç bir yoluxma faktı təsdiq olunmayıb.
Ona görə ki, 3-4 gün gəlib istehlakçıya çatana kimi həmin məhsulların üzərindəki koronavirus artıq ölür. Ən əsası qida məhsulları bişirilərək qəbul olunur, bişirmə mühitində də koronavirus ölür. Ona görə də qidada yoluxma yoxdur. Pambıq paltar geyinməklə mən koronavirusdan qorunacağam adlı bir iddia da yoxdur. Baxmayaraq ki, qısa zamanda pambıq parçaya düşən koronavirus yaşama qabiliyyətini itirir”.