“Sosial şəbəkələrdə və bəzi elektron informasiya vasitələrində gedən status və yazılarda adımın hallandırılmasından xəbərdaram və hesab edirəm ki, hər kəsin azad düşüncə və fikir bildirmək hüququ olduğundan buna normal yanaşmaq lazımdır”.

Yeniavaz.com xəbər verir ki, bu sözləri Teleqraf.com-a açıqlamasında Milli Məclisin deputatı Elnur Allahverdiyev deyib.

Millət vəkili vurğulayıb ki, altıncı çağırış Milli Məclisə deputat seçilməsindən sonra sahibkarlıq fəaliyyətinə son qoyub və şirkətdəki vəzifəsindən istefa verib: “Deputat olaraq fəaliyyətim göz qabağındadır və təəssüf edirəm ki, bəzən bu məzmunlu informasiyalar hazırki fəaliyyətimə kölgə salmaq və qərəzli niyyətlə edilir”.

Elnur Allahverdiyev qeyd edib ki, mart ayından bu yana müsahibə və açıqlamalarında sahibkarlıq fəaliyyətini dayandırdığını dəfələrlə bildirib: “Düşünürəm ki, professional jurnalist və ya bloggerlər bunu bilməmiş deyillər. Bununla belə, onlara fəaliyyətlərində uğurlar arzu edirəm, sadəcə, bəzi qarayaxmalara görə təəssüf hiss keçirirəm. Mənə elə gəlir, professionallıq nöqteyi-nəzərdən bu, onların özlərinin obyektivliyi üçün də ziyanlı mövqedir”.

Qeyd edək ki, sosial şəbəkələrdə “Müştəriyəm şikayətim var” adlı səhifədə “Kontakt Home” mağazalar şəbəkəsindən şikayətlər yer alıb. Həmin səhifənin Milli Məclisin deputatı Elnur Allahverdiyevin rəhbəri olduğu şirkət tərəfindən alındığı və şərhlərin silinməsi ilə bağlı iddialar səsləndirilib.