“Azərbaycana tarixi səfər etdik. Qarabağ zəfəri Türkiyə ilə Azərbaycan münasibətlərinin tarixində dönüş nöqtəsi oldu”.
Bu sözləri Türkiyə Prezidenti Rəcəb Tayyib Ərdoğan Bakı səfərindən qayıdarkən jurnalistlərin suallarına cavabında bildirib.
Ərdoğan Qarabağın zəfəri ilə nəticələnən 44 günlük mübarizə ərzində Türkiyənin anbaan Azərbaycanın yanında olduğunu bir daha bəyan edib:
“Prosesi şəxsən özüm tez-tez izləmişəm. Başda xarici işlər naziri, milli müdafiə naziri və Milli Kəşfiyyat Təşkilatının başçısı olmaqla bütün dostlarım mütəmadi əlaqədə idilər. Bundan əlavə, digər heyətlərimizin oraya gediş və gəlişləri ilə prosesi yaxından izlədik. Qardaşım İlham Əliyevlə daim telefon danışıqlarımız oldu. Dostlarımız davamlı olaraq cəbhədə və masada mübarizə apardılar. Bu 44 günün pərdə arxasının yazılacağına əminəm. Zaman bunun ciddi şahidi olacaqdır”, - deyə Ərdoğan sözlərinə əlavə edib.
Ərdoğan Qarabağ zəfəri ilə Qafqaz tarixinin yeni bir səhifəsinin açılmasına diqqət çəkib.