2023 və ya 2024-cü ildə dünya yeni temperatur rekordu ilə üzləşə bilər. 
“New York Post”un yazdığına görə, bu, Sakit Okeanın sularının istiləşdiyi El Nino fenomeninin qayıdışı ilə bağlı ola bilər.
Klimatoloqların fikrincə, son üç ildə Sakit okeanda suların genişmiqyaslı soyuması ilə bağlı olan La Nina fenomeni qeydə alınıb. Bununla belə, okean tezliklə əks fenomenə qayıda bilər. “El Nino adətən qlobal səviyyədə rekord temperaturla əlaqələndirilir.
Bunun 2023-cü ildə və ya 2024-cü ildə baş verib-verməyəcəyi hələ məlum deyil, amma düşünürəm ki, belə bir ehtimal var", - Copernicus iqlim dəyişikliyi xidmətindən Carlo Buontempo proqnozlaşdırıb.
2016-cı il dünyanın indiyədək ən isti ili olub. Son bir neçə ildə dünyada istiləşmə tendensiyası qeydə alınıb. El Nino 2023-cü ildə geri dönsə, 2016-cı ilin rekordu qırıla bilər.
El Nino ekvatorial Sakit okeanın səth sularının temperaturunda təbii dalğalanma olan Cənub rəqsinin bir mərhələsidir. Bu fenomen iki ildən yeddi ilə qədər qeyri-müntəzəm fasilələrlə təkrarlanır və orta hesabla beş il davam edir. El Niño, kənd təsərrüfatı və balıqçılıqdan asılı olan inkişaf etməkdə olan ölkələrə təsir edən anormal yüksək temperatur və quraqlıqlara kömək edir.