ABŞ-nin keçmiş Prezidenti Bill Klinton hələ 2011-ci ildə Rusiya lideri Vladimir Putinin Ukraynaya hücum etmək niyyətindən xəbərdar olduğunu bildirib.  
Klinton bu barədə Davosda müzakirələr zamanı deyib.
Onun sözlərinə görə, 2011-ci ildə Putinlə görüşdən sonra dərhal anlayıb ki, Rusiyanın Ukraynaya qarşı müharibəsi yalnız zaman məsələsidir.
Klintonun sözlərinə görə, görüş zamanı Putin 1990-cı illərdə ozamankı Rusiya Prezidenti Boris Yeltsin tərəfindən imzalanan Budapeşt Memorandumunu rədd edib. Məlum olduğu kimi, müqavilə nüvə silahı müqabilində Ukraynanın ərazi bütövlüyünə hörmət olunmasına zəmanət verirdi.
“2011-ci ildə - Krımın ələ keçirilməsindən üç il əvvəl - Vladimir Putin mənə Yeltsinlə bağladığım müqavilə ilə razılaşmadığını söylədi. Putin bu müqaviləni dəstəkləmədiyini və buna bir aidiyyəti olmadığını bildirdi. O gündən mən bilirdim ki, bu sadəcə olaraq zaman məsələsidir”, - deyə Klinton əlavə edib.
Mənbə: UNİAN