Ağstafanın 35 yaşlı icra başçısı Seymur Orucovun həyat tərzi barədə son günlər gundelik-baku.com-da xeyli bəhs etmişik.
Bu cavan oğlan görəsən hansı pulla dəyəri 350 min manat olan 10 NK 200 dövlət nömrə nişanlı “GMC Yukon Denali” markalı avtomobili qardaşı Vasif Orucovun adına alaraq, həyat yoldaşı Çeşmi xanımın ad günündə ona hədiyyə edir.
Və Çeşmi xanım bağça müdirəsi olduğu Maştağa qəsəbəsinə 350 minlik avtomobildə gedib-gəlir.
Məlumat üçün bildirək ki, Çeşmi Hacıyeva keçmiş millət vəkili, İqtisad Universitetinin sabiq rektoru Şəmsəddin Hacıyevin qızıdır. Və atasının zamanında universitetdə dekan vəzifəsində çalışıb. Sonradan universitetin yeni rektoru Ədalət Muradov Çeşmi xanımı vəzifədən çıxarıb.
Təsəvvür edirsiniz, dekan, sonra isə bağça müdirəsi olan Çeşmi xanım istixana- “parnik” sahibidir. Və Azəriqaza 115 min manat borcu var.
Birincisi, dekan, sonra bağça müdirəsi olan, yəni təhsil sahəsində vəzifə tutan bu gənc xanım necə istixana sahibi, yəni sahibkar-biznesmen ola bilər ?
İkincisi, 350 minlik avtomobildə gəzən xanımın Azəriqaza nə üçün 115 min manat borcu olmalıdır ?
Azəriqaz rəhbərliyinin , dövlətin istehsal etdiyi qazı Çeşmi xanımlara hədiyyə edir?
Bəs adi vətəndaşın 5 manat borcu olan kimi necə onun qazını kəsir ?
Görəsən icra başçısı həyat yoldaşının borcunu ödəmək əvəzinə niyə ona 350 minlik avtomobil hədiyyə edir ?
Bir filmdə deyilən kimi, “Ara, çaxırı içmisən, pulunu ver də..”.
İndi, cənab Seymur Orucov, qazın pulunu ver də.
Yaxşı, Novxanı ərazisində dəyəri yarım milyon olan iki bağ evini hansı pulla almısan, cənab başçı ?
Hazır ol, bir gün bu suallara cavab verməli olacaqsan.