Adı “Proqess”  MTK  olan şirkətin cinayət əməlləri...


Bir mənzili  5 nəfərə satan Emil Səməndərov niyə cəzasız qalır ? 



Öncə ondan başlayaq ki, son 20-30 ildə müxtəlif adlar altında  şirkətlər, firmalar yaradılır. Hamısının da adı Gəl-Gəl deyir. Mütərəqqi adlar, təmtəraqlı sözlər və reklamlar. Ancaq əməlləri ilə tanış olanda görürsən ki, heç zibil də deyillər.
Belə yerdə müdriklərin dediyi “ Kasıb itinin adını GÜMÜŞ qoyar” məsəli yada düşür. 
Bəli, şirkətinin adını “Proqress” qoyub. Bu sözün mənasını, yükünü  başa düşüb-düşməyib, deyə bilmərik. 
Ancaq hamıya bəllidir ki, proqress sözünün mənası TƏRƏQQİ, müsbət əməllər deməkdir. Hətta bununla bağlı  dünyada Proqressivizm deyilən bir fəlsəfi-ideoloji cərəyan var. Yəni inkişaf, tərəqqi, sivilləşmə və s. 
Bu kişinin də oğlu şirkətinin adını “Proqress 2016” MTK qoyub. Və Abşeron  rayonunda yerləşən bu şirkət  göydələn binalar tikməklə məşğuldur.
Yəqin ki, şirkətin elanına rast gələn yazıq müştəri də fikirləşir ki, sən öl, şirkətinə belə ad qoyubsa, bu adam “obrazovonski”dir, sivil adamdır. Yazıq nə bilsin ki, adı PROQRESS olsa da əslində əməlləri çox BARBAR birisidir.
Bəli, gözəl adların arxasında gizlənib, iyrənc əməlləri törətmək günümüzün reallığıdır.
Günümüzün ən iyrənc reallıqlarından biri də göydələnlər tikib milyonlar qazanan şirkətlərin vətəndaşları aldatması, bir mənzili 5 adama satmasıdır. 
Axı, anlamaq olmur ki, 1 qoyub 5 yox e, 10 götürən, milyonlar qazanan tikinti şirkətləri  vətəndaşları niyə aldadır ? Onsuz da milyonlar qazanırsan də. 
Həqiqətən də  son 10-15 ildə belə fırıldaq-cinayətkar şirkətlərin  sayı  dözülməz həddə çatıb. Ən dəhşətlisi odur ki, hüquq-mühafizə orqanları da  belə şirkətlərin əməllərinə göz yumur. 
Niyə, nə üçün ? 
Vətəndaşı bu dərəcədə dövlətdən narazı salmaq olmaz e.
Axı, dövlət qurumları bu cür fırıldaqların qarşısını vaxtında ala bilərdi. 
Axı, 100-lərlə  insan şikayət edir ki, müqavilədə mənzili 2 ilə tikib təhvil verməlidir, amma tikinti 5 ildir uzanır. 
Niyə pulu alanda əvvəlcədən ödənilir, amma mənzillər vaxtında təhvil verilimir ?  
Müqavilədə yüksək  səviyyədə təmir nəzərdə tutulur, amma təmir sıfır dərəcəsində. 
Axı, bu ölkədə də müştərinin, istehlakçının hüququ qorunmalıdır. 
Vaxtında təhvil vermirsənsə, müştəriyə təzminat ödəməlisən. 
Vaxtında olmadığı cəhənnəmə, hələ bir mənzili 5 adama satmağa nə ad verək ? 
Vətəndaş sovet dövründə olduğu kimi mənzillə təmin olunmur. Qalır bircə yol. Borc-xərc edib özünə, ailəsinə, övladına mənzil almaq. Mənzil satanların bəzilərisə cinayətkarlardır. 
Bir daha qeyd edirik ki, dövlət qurumlarının bu məsləyə göz yumması sadə məsələ deyil. 
Hətta şikayətçilər  ayaqlarını dirəyəndə, ora-bura şikayət edəndə, yəni bezdirəndə, hüquq-mühafizə orqanları şirkətin rəhbərinə 2-3 il iş verirlər. Bəs, sonra ?
Birincisi, 1 qoyun oğurlayana 6-7 il cəza verirsiniz, yüzlərlə vətəndaşa milyonlar atan  cinayətkar şəbəkəyə  niyə 2-3 il ?
İkincisi, şirkət rəhbəri həbs edildi, bəs  zərəçəkən vətəndaşlar neyləsin? Pullarını kimdən tələb etsin?
Bir sözlə, dövlət qurumları konkret olaraq  tikinti şirkələrini ciddi nəzarətə götüməli, bunun mexanizmlərini düşünüb tapmalıdırlar. 
Amma atalar deyib ki, 100 dəfə imam üçün ağlayanda 1-cə dəfə də yezid üçün ağla. Bəli, tikinti şirkətləri də dövlət qurumlarına milyonlarla rüşvət verirlər. Bu məsələ də ciddi nəzarətə götürülməlidir. 
Nə isə, sözün qısası, vətəndaşları aldadan şirkətlərdən biri də adı gözəl, “Proqress 2016” MTK-dır. 
Dəfələrlə bu MTK barəsində istintaq işləri aparılıb, amma nəticə olmayıb. 
Bu şirkət  Abşeron rayonunda inşa etdiyi binada payçılara qarşı  dəfələrlə  saxtakarlığa, hətta cinayət əməlinə yol verib. 
Şirkətin sahibi  Səməndərov Emil  Tofiq oğlu həm də “Hayan E” MMC-nin hüquqi sədridir. Bu adamın işi-gücü vətəndaşları aldatmaqdır. 
Payçılar  bu adamdan tələb edir ki, bağladığın  müqaviləyə əməl elə. 
Payçı deyir ki, 39 min manat verib mənzil almışam. Amma məlum olub ki, mənzil 2 il qabaq başqa şəxsə satılıb. 
Başqa bir vətəndaş isə  30 min manat ödəyib, amma tikinti başa çatmır, müqavilədə göstərilən müddət isə çoxdan bitib. 
Başqa müştərinin aldığı mənzili isə nə az, nə çox 5 nəfərə satıblar. 
Hələ bu harasıdır ? 
Emil Səməndərov 2-ci Qarabağ Müharibəsi qazisinə mənzil atıb. Yəni qazi mənzili ala bilmir. 
Bax, burda deyillər ki, bərəkallah tərbiyənə, Səməndərov. 
Bütün bunlar ortada ola-ola şirkətin sahibi azadlıqda gəzir, heç kəsi saymır. Hətta....
Hətta...şirkət rəhbəri  qoluzorlu  mühafizəçilərlə gəzir, şikayətçilər isə ona yaxın düşə bilmirlər. 
Ən gülməlisi, daha doğrusu, ağlamalısı odur ki, bir neçə dəfə  bu əməllərinə görə, məhkəmələr Emil Səməndərovu 3 min manat cərimələyib. Digər məhkəmə isə 3 min manat cəriməni 2500 manata endirib. 
Bu birbaşa cinayətkara qayğı və dəstəkdir. Bunun başqa adı ola bilməz. 
Vətəndaşlar dəfələrlə  Baş Prokurorluq yanında Korrupsiyaya qarşı Baş Mübarizə İdarəsinə, Abşeron  rayon prokurorluğuna müraciət ediblər. Ancaq nə faydası..
Hətta yazıq vətəndaşlar  deyir ki, 44 günlük Vətən müharibəsində  susduq, heç hara şikayət etmədik ki, qoy zəfər çalaq, sonra mübarizəmizi davam etdirərik. 
Vallah, bundan gözəl millət ola bilməz. Yazıq vətəndaş bundan artıq nə edə bilər ? 
Bəs bunun qarşılığında bizim dövlət orqanları niyə susur?
Axı, Emil Səməndərov dəfələrlə məhkum olunub və sonra buraxılıb. 
Yuxarıda əbəs yerə qeyd etmədik ki, vətəndaşı öz dövlətindən narazı salmayın, cənablar. 
Bəli, şikayətçilər indi də Prezident Adminstarsiyasının qarşısında aksiya keçirmək istəyirlər. 
Bunu istəyirsinizmi, cənab məmurlar ? /Gundelik-baku.com/