Nəzirə Məmmədova və qızı Zeynəb Məmmədli - onların hər ikisini ortaq tale birləşdirir, hər ikisinin atası Qarabağ döyüşlərində şəhid olub.
Xezerxeber.az-ın məlumatına görə, Nəzirənin I Qarabağ müharibəsində, Şuşa uğurunda gedən döyüşlərdə atası Heydər Həmidov, II Qarabağ müharibəsində isə həyat yoldaşı mayor Anar Məmmədov şəhidlik zirvəsinə yüksəlib.
34 yaşlı qəhrəmanımız 18 il idi ki, ön cəbhədə düşmənə sipər idi. Hətta Milli Qəhrəman Polad Həşimov Anara hər zaman "sən mənim səngərdə böyüyən zabitimsən" deyirmiş. O, Tərtər, Füzuli, Hadrut, Xocavəndin Tuğ və Şuşanın Daşaltı kəndləri istiqamətində gedən döyüşlərdə iştirak edir. Bir dəfə yaralansa da, öz istəyi ilə yenidən döyüşlərə qatılır. Anar Məmmədov noyabrın 1-də Xocavənd döyüşlərində şəhid olub.
Anar Məmmədov ailədə də hər kəsin dayağı, ümid yeri idi. İndi isə Anarla təkcə ailəsi yox, hər bir Azərbaycan vətəndaşı fəxr edir, qürur duyur.
Qeyd edək ki, Anar Məmmədov ölümündən sonra "Vətən uğrunda" medalı ilə təltif edilib.