“Yeni avtomobillərin bazarında 5 faizə qədər qiymət fərqi müşahidə oluna bilər”. 
Bu barədə Əmlak Ekspert Mərkəzinin direktoru Ramil Osmanlı məlumat verib.
O bildirib ki, burada söhbət yeni modifikasiyalardan, dizayn və interyer dəyişiklərindən, avtomobilin imkanlarının genişləndirilməsindən gedir:
“Bu meyarları nəzərə almaqla ötən ilin müvafiq dövrü ilə müqayisədə bazara təklif olunan qiymətlərdə qeyd edilən qiymət fərqi ola bilər. İkinci əl avtomobil bazarında isə hazırda qiymət artımına səbəb yoxdur. Doğrudur, qiymətlərin artdığı ilə bağlı fikirlər mövcuddur. Lakin alqı-satqı əməliyyatlarında bu proses demək olar ki, müşahidə olunmur”.
Ekspertin fikrincə, pandemiya avtomobilləşmə prosesində insanlarda stimul yaradıb, ictimai nəqliyyatın hərəkətinə qadağaların tətbiq edilməsi vətəndaşlarda avtomobilə olan marağı bir qədər də artırıb. Tələbatın artmasına baxmayaraq bütün vətəndaşların imkanları tam şəkildə buna adekvat olmaya bilər. Bu cəhətdən pandemiya Azərbaycanda ikinci əl avtomobil bazarındakı qiymətlərə o qədər də təsir göstərmədi. Post-pandemiyada isə qiymətlərin necə olacağı ilə bağlı proqnoz vermək hələ tezdir. Prosesin necə irəliləyəcəyi və necə bitəcəyi bəlli deyil”.
Ramil Osmanlı qeyd edib ki, illər keçdikcə Azərbaycanda avtomobil parkının yenilənməsi prosesi gedir, lakin bu prosesin qarşısını bəzi inzibati qərarlar alır:
“2013-2014-cü illərdə Azərbaycana il ərzində 100 minə yaxın nəqliyyat vasitəsi idxal olunurdusa, burada minik avtomobillərinin xüsusi çəkisi 80 faizdən çox idi. Hazırda isə bu rəqəmlər son 1-2 ildə təqribən 40-45 min ətrafında dəyişir və minik avtomobillərinin payı ən yaxşı halda 75 faizə yaxın olur. Azərbaycanda yeni avtomobillərin, təqribən 10 il ərzində istismarda olan nəqliyyat vasitələrinin ümumi avtomobil parkındakı payının ən yaxşı halda 20-25 faizə bərabər olacağı gözlənilir”.