“Azərbaycan dünya miqyasında elə də böyük dövlət deyil. Lakin onun sözünün  mənası və çəkisi böyükdür.” Cöx böyük məna yükü və əhəmiyyəti olan bu  fikirlərin müəllifi Azərbaycan Respublikasının Prezidenti cənab İlham Əliyevdir.  Azərbaycanın dünya miqyasında sözünün çəkisinin böyüklüyünü təmin edən şəxs də onun özüdür, cənab Prezidentdir.  Ölkə Prezidentinin həyata keçirdiyi uğurlu  daxili və xarici siyasət sayəsində  bu gün Azərbaycan dünyada  mövqeləri kifayət qədər güclü olan bir  dövlətə çevrilib.  Azərbaycanı beynəlxalq aləmdə etibarlı tərəfdaş kimi  qəbul edirlər. Azərbaycan  qarşısına qoyduğu istənilən hədəfə çatmaq iqtidarında olan  və  eyni zamanda, Ali Baş Komandanının rəhbərliyi ilə  yeni bir tarix yazan, yeni  reallıqlar yaradan dövlətdir. Xüsusilə də 44 günlük  Vətən müharibəsi dövründə  Ali Baş Komandanın rəhbərliyi ilə    yenilməz Ordumuzun qazandığı  tarixi Qələbə sözün həqiqi  mənasında  Azərbaycanın gücünü və potensialını ortaya qoydu.”
   Bu fikirləri Milli Məclisin deputatı Elman Nəsirov bildirib.
   E.Nəsirov qeyd edib ki,  tarixi Qələbəmiz   onu  təmin edən üç  mühüm amili də ortaya qoydu: “Birincisi,  Ali Baş Komandanın siyasi iradəsi,  ikincisi, ordumuzun Ali Baş Komandanın rəhbərliyi ilə göstərdiyi qəhrəmanlıq, üçüncü həlledici amil isə  xalqın birbaşa dəstəyidir. Azərbaycan Prezidentinin qazandığı bütün tarixi  uğurların kökündə dayanan  əsas  amil budur ki, o, öz xalqını  bütün varlığı ilə sevir.  Bu sevgi qarşılıqlıdır. Xalq da  cənab Prezidentin arxasında dayanıb. Onun  hər bir  təşəbbüsünü, fikrini və mövqeyini birmənalı  dəstəkləyir.  Bunun sayəsində müəyyən  beynəlxalq siyasi dairələr, anti-Azərbaycan qüvvələr ölkəmizlə bağlı çirkin niyyətlərini həyata keçirmək üçün heç bir münbit şərait əldə edə bilmirlər.   Bunun səbəbi həm də onunla bağlıdır ki,  ölkə  Prezidenti İlham Əliyev müstəqil, xalqının milli mənafeyindən irəli gələn  siyasət həyata keçirir.”
   Millət vəkili bu məqamı da xüsusi qeyd edib ki,  bu siyasət heç bir halda üçüncü dövləti  hədəfə almayıb: “Bu, qarşılıqlı əməkdaşlığa,  bərabərhüquqa söykənən siyasətdir.  Bunun sayəsindədir ki, dünyanı narahat edən ən mürəkkəb məsələləri müzakirə etmək üçün ABŞ və Rusiya, NATO və Rusiya hərbi rəhbərliyi  danışıqlar aparmaq üçün məhz Azərbycanın paytaxtını, Bakı şəhərini seçirlər.  Bu nəyin sayəsindədir?  Ölkə Prezidenti İlham Əliyev   elə bir siyasət həyata keçirir ki,  ona inanır,  etimad göstərir,  etibar edirlər. Məhz Azərbaycanda  çox mühüm yüksək səviyyəli beynəlxalq danışıqlar həyata keçirilir.”
  “Azərbaycan qarşısında yeni hədəflər müəyyən edib” söyləyən Elman Nəsirov bildirib ki, işğaldan azad edilmiş torpaqların bərpası və yenidən qurulması bizim üçün bi nömrəli  məsələdir: “Bunu həyata keçirmək üçün  bütün imkanlarımız var. Siyasi iradə, xalqın dəstəyi ortadadır. Maliyyə  resurslarımız var və  dostlarımız bizi dəstəkləyir. Bu hədəfə də çatacağıq. Bu, zaman məsələsidir və  işğaldan azad olunmuş  torpaqlarımızın, Qarabağın cənnətə çevrilməsi həm də  strateji hədəf kimi müəyyənləşdirilir. Bunun da böyük mənası var. Qoy Ermənistan dövləti və  onun siyasi-hərbi  rəhbərliyi  papağını qarşısına qoyub düşünsün ki,  yeganə yol əməkdaşlıq yoludur. Konfrantasiya yolu  Ermənistanı  uçuruma sürükləyir.  Ermənistan həmin uçurumun astanasındadır. Yalnız  əməkdaşlıq yolu ilə onun nicatı və xilası mümkündür. Ermənistan nə qədər  bunu tez dərk etsə bir o qədər də   düşdüyü bu fəlakətli vəziyyətdən  çıxış yolu tapa bilər. Azərbaycan  Prezidenti əməkdaşlıq yolunu təklif edib. Qalır qarşı tərəfin  mövqeyi, müsbət davranışı. Əgər bu olmayacağı tədirdə yenə də  Ali Baş Komandanımızın   sözləri ilə fikirimi yekunlaşdırıram ki,  dəmir yumruq yerindədir.”