Son zamanlar rayonlarda müşahidə edilən dəyişkən hava şəraiti, güclü yağış kənd təsərrüfatına da ziyan vurub.
Bunun isə meyvə- tərəvəz bazarında qiymət artımı yaradacağı gözlənilir.
Aqrar Elm və İnnovasiya Mərkəzinin şöbə müdiri Nicat Nəsirli Bakı Səsi-nə bildirib ki, güclü yağışlar kənd təsərrüfatının bir sahəsinə ziyan vursa da, taxıl və arpada dəyişiklik müşahidə edilməyib: "Məlum olduğu kimi, bir çox rayonlar üzrə taxıl və arpa biçini yekunlaşıb. Yaxın zamanlarda dağlıq və dağətəyi rayonlarda da biçininin tam yekunlaşacağı gözlənilir. Ona görə deyərdim ki, güclü yağışlar bu sahəyə elə də çox ziyan vurmayıb və bu sahədə bahalaşma gözlənilmir".
Nicat Nəsirli qeyd edir ki, güclü yağışlar nəticəsində meyvə bağlarına ziyan dəyib: " Meyvə-tərəvəzin qiymət artımına gldikdə, burada bəzi dəyişikliklər gözləniləndir. Yağan yağışlar bəzi meyvələrə ziyan vurub, onların yetişməsində, formalaşmasında müxtəlif qəribəliklər yaradıb. Məsələn, almanın görkəmində müəyyən əyriliklər müşahidə edilir. Bu da istehsalçıdan əlavə qulluq, əmək tələb edir".
Gücləndirilmiş karantin rejiminin iş prosesinə mane olduğunu bildirən eksperin fikrincə, bəzi qiymət dəyişikliyi olarsa, anlayışla qarşılanacaq: "Digər tərəfdən, gücləndirilmiş karantin rejimində edilən bəzi dəyişikliklər də qiymətlərin dəyişməsinə səbəb ola bilər. Bu şəraitdə fermerdən məhsulu daha iri kombaynlarla yığılması gözlənilir, lakin buna da hər fermerin maddiyatı əl vermir".