Xəbər verdiyimiz kimi dünən redaksiyamıza müraciət edən Qarabağ qazisi Atakişiyev Zaur Tiflis oğlu onurğa sümüyündən əməliyyat olunması üçün ölkə başçısından kömək istəmişdi. 
 
Əslən Füzuli rayonundan olan Z.Atakişiyev bu gün Moderator.az-ın redaksiyası ilə əlaqə saxlayaraq deputat Vüqar Bayramovun köməkçisinin onunla əlaqə saxladığını bildirib:

“Vəziyyətimi siz saytınızda işıqlandırdıqdan sonra bir neçə yerdən mənə zənglər oldu. Bu gün deputat Vüqar Bayramovun köməkçisi mənimlə əlaqə saxlayıb məktubla deputata müraciət etməyimi bildirdi. Mən də indi birtəhər də olsa poçta gəlmişəm və deputata vəziyyətimlə bağlı məktub göndərirəm. V.Bayramovun köməkçisi dedi ki, nəsə bir köməklik olunacaq. Hamınıza buna görə təşəkkür edirəm. İnşallah inanıram ki, hər şey yaxşı olacaq”. 

Qeyd edək ki, bu gün onurğa sümüyündəki problemlərdən əziyyət çəkən Z.Atakişiyev dörd il üç ay Qarabağ döyüşlərində iştirak edib.

Deputat Vüqar Bayramov isə Moderator.az-a açıqlamasında onlara edilən müraciətlərə dəstək olduqlarını bildirib:

“Biz bütün müraciətlərlə bağlı sorğu göndəririk. Sözün düzü, ötən ay 476 müraciət olub və hamısını ünvanıyla təqdir etmişik. Nə müraciət olursa, hamısına biz dəstək oluruq”.

Vasif Əlihüseyn