“Azərbaycan hakimiyyəti Rusiya ilə Qarabağda sülhməramlı qüvvələrin fəaliyyətiylə bağlı memarandum bağlamaq niyyətindədir”.
Bunu politoloq Məhəmməd Əsədullazadə deyib. O qeyd edib ki, Rusiya sülhməramlı qüvvələrinin Qarabağdakı özbaşına hərəkətləri, humanitar sahədəki fəaliyyətləri və Ermənistan rəsmilərinin Xankəndiyə gəlməsi prezident İlham Əliyevin açıq şəkildə etiraz etməsinə gətirib çıxarıdı:
“Onların fəaliyyəti dəqiq göstərilməlidir. Çünki onların hazırkı fəaliyyəti sülhün təmini deyil, vəziyyəti mürəkkəbləşdirməyə doğru aparır. Məhz İlham Əliyevdə bu xüsusda mesajlarını verdi. Yaxın müddətdə Rusiya sülhməramlı qüvvələrinin fəaliyyətinə aydınlıq gələcək. Onların hazırkı sərbəst fəaliyyəti olmaya bilər.
Prezidentin Ermənistan xarici işlər nazirinin Xankəndiyə gəlməsi ilə əlaqədar mövqeyi Ermənistan və Rusiyaya mesajdır. Ermənistan rəsmiləri Xankəndinə gəlməyə cürət etməyəcəklər. Gələrlərsə, Azərbaycanın icazəsi ilə həyata keçirilə bilər. Əks təqdirdə Laçın dəhlizində Azərbaycan əsgərləri onları qarşılayacaq. İlham Əliyevin bu bəyanatı sıradan deyil. Burada ciddi təzyiq mexanizmi var. Rusiya "sülhməramlı qüvvələri” də Ermənistan rəsmilərinin Xankəndiyə gəlişinə icazə verməyə bilər.  
Demək, bununla da Xankəndidə separatçıların izolyasiyası davam edəcək. Laçın dəhlizi Azərbaycanın ərazisidir və burada Azərbaycanın post qurması mümkün ssenarilər sırasındadır”.