Braziliya Prezidenti Jair Bolsonaru səhiyyə nazirindən Braziliyada maskalarının istifadəsinə son qoyulması üçün tarix təyin etməsini istəyəcək.
"Reuters" xəbər verir ki, bu barədə prezident özü açıqlama verib.
O, radioya verdiyi müsahibədə əhalinin çoxu artıq peyvənd edildiyi və ya virusa yoluxduğu üçün maskalara ehtiyac olmadığını iddia edib.
Epidemioloqlar Braziliyada xüsusilə “Delta” variantının artmasına görə belə bir addım atmağın tez olduğunu söyləyirlər.
Hazırda Braziliya əhalisinin təxminən 60 faizi ilk dozanı vurdursa da, yalnız 25 faiz tam vaksinasiya olunub.
Qeyd edək ki, maska məsələsi Braziliyada siyasi bir mövzu halına gəlib, Bolsonaro uzun müddət onun istifadəsinə qarşı çıxıb və qanuni tələbə baxmayaraq, tez-tez ictimai yerlərdə taxmaqdan imtina edib.