Polşa Xarici İşlər Nazirliyi ölkə vətəndaşlarına Rusiya və Belarus ərazilərini tərk etməyi tövsiyə edib.

Müvafiq bəyanat nazirliyin saytında yerləşdirilib.

"Biz Rusiya Federasiyasının ərazisində qalan Polşa vətəndaşlarına mövcud kommersiya və şəxsi vasitələrin köməyi ilə oranı tərk etməyi tövsiyə edirik”, - deyə məlumatda bildirilir. Analoji tövsiyə Belarusa da aiddir.

"Ukraynadakı vəziyyət, bunun nəticəsində Polşa ilə Rusiya arasında hava nəqliyyatının dayandırılması, eləcə də quru yolu ilə Polşaya qayıtmaq imkanlarının çox məhdud olması səbəbindən Xarici İşlər Nazirliyi Rusiyaya səfəri tövsiyə etmir.

Regionda artan gərginlik və hərbi hadisələrlə əlaqədar Xarici İşlər Nazirliyi Polşa vətəndaşlarına Belarus Respublikasına səfər etməməyi tövsiyə edir. Təhlükəsizlik vəziyyətinin kəskin pisləşməsi, sərhədlərin bağlanması və ya digər gözlənilməz vəziyyətlər zamanı çıxış əhəmiyyətli dərəcədə çətinləşə və ya hətta qeyri-mümkün ola bilər”,- xəbərdə vurğulanır.