Bu gün Rusiya prezidenti Vladimir Putin Türkiyə lideri Rəcəb Tayyib Ərdoğanla telefon danışığı aparacaq.
Putin Ərdoğanla zəlzələdən zərər çəkənlərə yardım göstərilməsini müzakirə edəcək.
"Rusiya tərəfi də müvafiq kanallar vasitəsilə zəlzələdən xeyli zərər çəkən Türkiyə rəhbərliyinə təcili yardım göstərməyə hazır olduğunu bildirib. Vladimir Putin bu gün Türkiyə Respublikasının Prezidenti Rəcəb Tayyib Ərdoğanla bu məsələ ilə bağlı danışacaq”, - deyə Kremldən bildirilib.
Kremlin mətbuat xidməti qeyd edib ki, Rusiya prezidenti ilə Rəcəb Tayyib Ərdoğan arasında söhbət gün ərzində baş tutacaq. Onlar əlavə ediblər ki, dövlət başçısı artıq Suriya prezidenti Bəşər Əsədlə telefonla danışıb. Söhbət zamanı Vladimir Putin Suriyanın şimalında baş vermiş zəlzələnin nəticələri ilə bağlı başsağlığı verib və təbii fəlakətin nəticələrinin aradan qaldırılması üçün ölkəyə lazımi köməklik göstərməyi təklif edib.
Bu gün Türkiyədə bir neçə zəlzələ baş verib. Respublikada 1000-dən çox, qonşu Suriyada isə 400-dən çox insan həlak olub.
Rusiya Səhiyyə Nazirliyi zərərçəkənlərə kömək etmək üçün Türkiyə və Suriyaya mütəxəssislər göndərməyə hazır olduğunu açıqlayıb.