“Telegram”da kamera və mikrofonu aktivləşdirən boşluq aşkar edilib. 
Xarici mətbuat xəbər verir ki, “Google” mühəndisi Dan Reva Teleqram messencerinin “macOS” üçün nəzərdə tutulmuş versiyasında cihazın sahibinin xəbəri olmadan kamera və mikrofonu aktivləşdirən təhlükəli boşluq təyin edib.  
Yaranan boşluq Teleqramın “macOS” versiyasına zərərli dinamik kitabxana (Dylib) yeritməyə, kamera tərəfindən çəkilmiş videonu yazmağa və qeydi gizli qovluqda saxlamağa imkan verir.
Bunun səbəbi Teleqram messencerinin “Apple”ın “Hardened Runtime” və “Entitlements” adlı daxili təhlükəsizlik mexanizmlərindən istifadə etməməsidir.
Həmçinin qeyd edilir ki, bu boşluq qismən “Apple”ın günahıdır. Çünki şirkət iOS proqramları üçün tələb olunsa da, “macOS” proqramları üçün Hardened Runtime tələb etmir.
Dan Reva bu problemin olduğunu hələ 2023-cü ilin fevralında Telegram rəhbərliyinə bildirsə də, hələ də cavab almayıb.