Avstraliyalı tədqiqatçılar taurin və qara bibər ekstraktı kombinasiyasının ürək-damar xəstəlikləri üçün risk faktorlarını azaltmaqda effektivliyini sübut ediblər. 
Viktoriya Universitetinin alimlərinin araşdırması “Nutrients” jurnalında dərc olunub.
Əsrlər boyu təbii məhsullar ürək-damar və bir çox digər xəstəliklərin müalicəsində istifadə edilib. Xüsusilə, taurin və qara bibər iltihab əleyhinə, antihipertenziv, antioksidant və aterosklerotik xüsusiyyətlərə əsaslanan kardioprotektiv təsirlərinə görə son vaxtlar çox diqqət çəkir.
Taurin bədəndə sistein və metionindən əmələ gələn sulfon turşusudur (kükürdlü amin turşusu).
Bununla belə, taurinin çox hissəsi bədənə dəniz məhsulları, yumurta, ət və quş ətinin istifadəsi ilə daxil olur. Taurin iltihab əleyhinə təsir göstərir. Bundan əlavə, qan təzyiqi və damar tutulmasını da modullaşdıra bilər.
Qara bibər tərkibindəki terpenlərin çox olması səbəbindən bir çox xəstəliklərin müalicəsində geniş istifadə olunur. Bu bioaktiv birləşmələr bitki əsaslı efir yağlarında çox rast gəlinən müxtəlif üzvi birləşmələr sinfidir. Antioksidant, antiinflamatuar, antihiperlipidemik və qan təzyiqini aşağı salan xüsusiyyətlərə malikdir.
Müəlliflər öz işlərində bu birləşmənin xüsusiyyətlərini və effektivliyini qiymətləndirən mövcud ədəbiyyatı təhlil ediblər.
Bir sıra tədqiqatlar göstərib ki, kəskin və xroniki iltihab ürək-damar xəstəliklərinin inkişafında və şiddətində mühüm rol oynayır. Taurin və qara bibərdə mövcud olan bioaktiv birləşmələr iltihaba qarşı vasitəçilərin ifadəsini əhəmiyyətli dərəcədə zəiflədir, iltihabın yaratdığı zərərin şiddətini azaldır.