“Rusiya bu gün səhər saatlarında paytaxt Kiyevi yenidən raket atəşinə tutub. İlkin məlumata görə, şəhərə “İsgəndər-M” tipli ballistik raketlər atılıb”.
Bunu “Report”un Şərqi Avropa bürosuna açıqlamasında Ukrayna Hərbi Hava Qüvvələrinin (HHQ) sözçüsü Yuri İqnat bildirib.
Onun sözlərinə görə, həmin raketlər “Patriot” hava hücumundan müdafiə sistemləri vasitəsilə zərərsizləşdirilib:
“Yerli hərbi administrasiyanın ilkin məlumatına görə, infrastruktura ciddi zərər dəyməyib və insanlar arasında da itki yoxdur. Bir sözlə, işğalçıların növbəti hücumu dəf edilib”.
Y.İqnat əlavə edib ki, Rusiya noyabrın 11-nə keçən gecə Ukrayna ərazisinə üç istiqamətdə 31 “Shahed” pilotsuz uçuş aparatından (PUA) istifadə edərək hücum həyata keçirib:
“Bu PUA-ların 12-si Ukraynanın Hava Hücumundan Müdafiə bölmələri tərəfindən məhv edilib. Rusiya əsasən sərhəd bölgəsinə hücumlar həyata keçirib. Bundan başqa, Rusiya Ukrayna ərazisinə 3 raketlə zərbə endirib: “X-31”, “P-800 Oniks” və “S-300”.
10:48
Bu gün Ukraynanın paytaxt Kiyev də daxil olmaqla bir sıra şəhər vilayətlərinə hava zərbələri endirilib.
“Report”un Şərqi Avropa bürosunun məlumatına görə, ötən gecədən bütün ölkə boyu kütləvi hava həyəcan siqnallarının ardınca səhər saatlarında Rusiya tərəfindən endirilən hava zərbələrinin qarşısı Ukrayna hava hücumundan müdafiə sistemi tərəfindən alınsa da onlardan şəhərə düşənlər də olub.
Hücumlar nəticəsində bu dəqiqələrdə hazırda Kiyev şəhərində güclü partlayışlar baş verib. Hücumun nəticələri ilə bağlı hələ rəsmi açıqlama verilməyib.
Qeyd edək ki, bir neçə ay idi paytaxt Kiyevdə sakitlik idi.