İsrailin kəşfiyyat xidməti Mossad-ın rəhbəri David Barnea girovların azad edilməsi ilə bağlı razılaşmanın yekun variantını müzakirə etmək üçün yaxın vaxtlarda yenidən Qətərə səfər edə bilər.

Bu barədə İsrailin “Yediot Ahronot” qəzeti məlumat yayıb.

Bildirilib ki, İsrail və HAMAS arasında razılaşma bu həftənin sonuna qədər əldə oluna bilər. Əgər bu baş verərsə və plan İsrailin Nazirlər Kabinetinin üzvləri tərəfindən təsdiqlənərsə, razılaşma elan oluna bilər.

Qəzet həmçinin bildirir ki, tərəflər bir çox məqamlarda güzəştə getmək istəmədiyi üçün İsrail və HAMAS arasında danışıqlar son dərəcə çətin irəliləyir. Xüsusən də İsrail HAMAS-ın istədiyi kimi 5 günlük atəşkəs elan etməkdən imtina edib və qarşı tərəf buna cavab olaraq azad olunacaq girovların sayını 80 nəfərdən 50 nəfərə endirib. Bundan əlavə, İsrail uşaqların yalnız anaları ilə birlikdə azad olunmasını, yaşlı girovların azad edilməsini tələb edir, lakin öz həbsxanalarından yaşlı fələstinli məhbusları azad etməyə razı deyil. Buna cavab olaraq HAMAS da girov götürdüyü yaşlı israilliləri azad etməkdən imtina edib.