Azərbaycanda 2 gün ərzində sürücülər 4 piyadanı vurub hadisə yerindən qaçıblar.

“Bakisesi.com” DİN-ə istinadən xəbər verir ki, oktyabrın 6-da saat 21 radələrində Abşeron rayon, Hökməli qəsəbəsində Bakı şəhər sakini Novruz Abbasov naməlum avtomobil tərəfindən vurulub və piyada xəsarətlə xəstəxanaya yerləşdirilib. Qəzanın “KamAZ” markalı avtomobillə törədildiyi müəyyən edilib və həmin nəqliyyat vasitəsini idarə edən Laçın rayon sakini Cəbrayıl Səfərov saxlanılıb.

Eyni gündə, eyni saatda oxşar hadisə paytaxta qeydə alınıb. Sabunçu rayonunun Məhəmmədi qəsəbəsi ərazisində Anar Cəlali avtomobillə vurulub və 3 saylı şəhər klinik xəstəxanasına yerləşdirilib. Qəzanı törədən VAZ-2103” markalı avtomobilin sürücüsü, Bakı şəhər sakini Aqil Salmanov saxlanılıb.

Digər hadisə də eyni gündə, 1 saat tez Zaqatala rayonunun Muxax kəndi ərazisində baş verib. Yolu keçən kənd sakini Abdulrəhman İbiyev avtomobillə vurulub və ölüb. Hadisəni törədən “Mercedes” markalı avtomobilin sürücüsü Bakı şəhər sakini Oqtay Mirzəyev polis əməkdaşları tərəfindən saxlanılıb.

Oktyabrın 7-də saat 21 radələrində Səbail rayonunun A.İsmayılov küçəsində müəyyən edilməmiş avtomobillə yolu keçən Bakı şəhər sakini Sədrəddin Şahməmmədov vurulub. Piyadaya xəstəxanada ilkin tibbi yardım göstərildikdən sonra buraxılıb. Hadisə yerindən yayınmaqda şübhəli bilinən “Ford” markalı avtomobilin sürücüsü, Bakı şəhər sakini Elmin Əhmədli saxlanılıb.

Faktlarla bağlı araşdırmalar aparılır.скачать dle 12.1