Bakisesi.com-un məlumata görə, tədbirdə gənclər və idman naziri Azad Rəhimov və BMT Inkişaf Proqramının Rezident Nümayəndəsinin müavini Alessandro Frakasseti iştirak edirdilər.
Nazir Azad Rəhimov, 17 Gənc Səfiri təbrik edərək, onlara məsuliyyətli işdə uğurlar arzu edib. Nazir, gənclərin Azərbaycan, BMT və eyni zamanda, dünya səviyyəsində çox böyük uğur qazanacaqlarına inandığını bildirdi . Azad Rəhimov qeyd etdi ki, Gənc Səfir seçilmək üçün müsabiqəyə 220-dən çox ərizə daxil olmuşdu. Bu gənclərdən ilkin mərhələdə 53-ü, seçim prosesinin yekununda isə, müvafiq bilik və bacarıqlara malik 17-i, 2 il müddətinə (01.11.2018-31.10.2020) Dayanıqlı İnkişaf Məqsədləri üzrə Gənc Səfir seçilmişdir.
BMT Inkişaf Proqramının Rezident Nümayəndəsinin müavini Alessandro Frakasseti Gənclər və idman nazirliyinə göstərdikləri dəstək üçün öz təşəkkürünü bildirib, bu gənclərin hər birinin təmsil edəcəkləri sahədə uğurlu olacaqlarına inandığını bildirib.
Qeyd edək ki, seçilmiş 17 Gənc Səfirin əsas məqsədi Dayanıqlı İnkişaf Məqsədlərini Azərbaycanda təbliğ etmək, DİM-lərə nail olmaqda gənclərin iştirakını təşviq etmək, bu sahə üzrə fəaliyyət göstərən dövlət qurumlarına tam könüllü formada dəstək göstərmək, yerli, milli və beynəlxalq səviyyədə atılan addımlar barədə cəmiyyətin məlumatlandırılmasına dəstək olmaq, milli hesabatların hazırlanmasına töhvə vermək və ölkədə DİM-lərlə əlaqəli həyata keçirilən təşəbbüslərdə fəal iştirak etməkdir.
