Dünən Mərkəzi Bank 2021-ci ildə bank sektorunun yekun göstəricilərini açıqlayıb. Pandemiya ucbatından iqtisadi böhranlarla yadda qalan 2020-ci illə müqayisədə ötən il banklar iqtisadi göstəricilərini yaxşılaşdıra bilib.
Deməli, ötən il ölkəmizdəki bankların xalis mənfəəti 609 milyon manat olub.
Məlumat üçün qeyd edək ki, 2020-ci ildə bankların xalis mənfəəti 568 milyon manat olmuşdu.
Deməli, banklar ötən 2020-ci illə müqayisədə 41 milyon manat daha çox mənfəət əldə ediblər.
Hazırda Azərbaycanda 26 bank fəaliyyət göstərir.
Mərkəzi Bankın açıqlamasından bəlli olur ki, həmin bankların 23-ü ili mənfəətlə, üçü isə zərərlə başa vurub.
Zərərlə işləyən banklardan birinin Türkiyənin Yapı Kredi Bankının Azərbaycan filialı olduğunu görəndə xeyli təəccübləndik.
Görəsən, niyə Yapı Kredi Bank zərərlə işləyib ?
Bəlkə, bu bank öz gəlirlərini gizlədir ?
Axı, heç kimə sirr deyil ki, Yapı Kredi Bank ən yüksək faizlə istehlak kreditləri verir…
Yeri gəlmişkən, Yapı Kredi bankın biznes kreditləri də kifayət qədərdir.
Bəs, onda bu bankın zərərlə işləməsinin səbəbi nədir ?
Axı, ölkəmizdə fəaliyyət göstərən banklar arasında Yapı Kredi Bank elə də yüksək əmək haqqı vermir.
Görəsən, bu bankın illik xərcləri nə qədərdir ?
Sözün düzü, əlimizdə konkret rəqəmlər olmadığı üçün konkret nəsə demək istəmirik.
Amma, görəsən, Mərkəzi Bankın sədri cənab Elman Rüstəmov niyə maraqlanmır ki, bu bank nə üçün zərərlə işləyib ?
Onsuz da bu gün təkcə banklar deyil, digər biznes qurumları da öz gəlirlərini az göstərir, xərclərini çox göstərərək, xalis mənfəəti azaldırlar.
Və beləcə dövlət büdcəsinə ödənilən vergilər azaldılır.
Yapı Kredi Bankla bağlı onu deyə bilərik ki, bu bank həmişə medianın diqqət mərkəzində olub, daha doğrusu, bankda baş verən neqativ hallar ictimailəşib.
Ancaq az müddət sonra bankın “makler”ləri saytlarla “sövdələşərək” yazıları sildiriblər.
Görəsən, bankın rəhbərliyi bu “bazarlığı” qardaş Türkiyədə edə bilərdimi ?
Əlbəttə, yox.
Digər tərəfdən Yapı Kredi Bank reklam vermək adı ilə bir çox media qurumlarının “ağzına daş basıb”.
Növbəti yazıda Yapı Kredi Bankda əhalinin depozitləri ilə bağlı araşdırma yazısını dərc edəcəyik.
Bizi izləyin.
Qarşı tərəfin mövqeyini dərc etməyə hazırıq. /Gundelik-baku.com/