İTV-də yayımlanan “Evdə Qol” verilişinin budəfəki qonaqları sərbəst güləş üzrə Olimpiya mükafatçımız, üçqat dünya və üçqat Avropa çempionumuz Hacı Əliyevlə II Avropa Oyunlarının qalibi, boks millimizin üzvü Alfonso Dominqes olub.
 “PlayStation”un PES2020 oyunu üzrə 1/4 final çərçivəsində qarşılaşan idmançıların oyunu çox gərgin keçib.
Hacı Kriştianu Ronaldunun azarkeşi olduğu üçün “Yuventus”u seçib. Kubalı legionerimiz I Avropa Oyunlarının qalibi Lorenso Sotomayorla birgə “oyuna gəlib”. O, “Yuventus” azarkeşi olsa da, məcburiyyətdən Madrid “Atletiko”sunu seçib.
Tanınmış güləşçimiz ilk oyunda 2:0, ikinci qarşılaşmada isə 1:0 qalib gəlib. Sonda isə Alfonso Dominqes puerto rikolu müğənni Luis Fonsinin məşhur “Despasito” mahnısını ifa edib.

Beləliklə, Hacı Əliyevin yarımfinalda rəqibi cüdoçu Hidayət Heydərov olacaq.