Ermənistanın Baş naziri Nikol Paşinyan deyib ki, Laçın dəhlizinə alternativ yolun inşası başa çatdıqdan sonra keçmiş Dağlıq Qarabağ Muxtar Vilayətindən kənarda yerləşən ərazilər Azərbaycana qaytarılacaq. Paşinyan bildirib ki, Azərbaycana təhvil veriləcək Laçın şəhəri və Zabux kəndinin sakinləri mənzillə təmin olunacaq. “Laçın dəhlizi”nə çəkilən alternativ yol istifadəyə veriləndən sonra Laçın şəhəri və Zabux kəndi ilə yanaşı, bir qrup erməninin qanunsuz yaşadığı Sus kəndi də Azərbaycan Silahlı Qüvvələrinin nəzarətinə keçəcək.
Mövzu barədə danışan milət vəkili, politoloq Elman Nəsirov bildirdi ki, Nikol Paşinyan çıxışları ilə öz sözlərini təkzib edir:
“Ermənistan baş naziri Nikol Paşinyan gün ərzində özü-özünü təkzib edən bir neçə bəyanatla çıxış edib. O Azərbaycan tərəfinin mart ayında irəli sürdüyü 5 baza prinsipini qəbul etdiyini söyləyib. Sonralar isə yenidən olmayan Dağlıq Qarabağ ərazisi ilə bağlı iddialar ortaya qoyub, statusundan və ATƏT-in MİNSK qrupunun mövcud olmadığı bir reallıqda həmin qurumun vacibliyindən bəhs edib. Tənzimləməni dəstəkləyib. Eyni zamanda regionda davamlı, dayanıqlı sülhün formalaşması üçün lazım ola biləcək bir mövqe ortaya qoyur”.
Siyasətçi bildirdi ki, Paşinyanın son mövqelərindən biri Laçın şəhəri və ətrafındakı müəyyən kəndlərin Azərbaycan tərəfinin tam nəzarətinə keçməsi ilə bağlıdır: “Bu da Ermənistan sosial şəbəkələrində çox ciddi müzakirəyə səbəb olub. Ermənistan əhalisi hesab edir ki, bu Paşinyanın sayca ikinci kapitulyasiya aktıdır. Amma hər halda Paşinyan ölkəsinin silahlı qüvvələrinin ali baş komandanı, baş nazir olaraq çox gözəl fərqindədir ki, əməkdaşlıqdan başqa çarəsi yoxdur. Əməkdaşlığın əksi olsa-olsa müharibə ola bilər. O müharibə isə Ermənistan üçün fəlakətdir, sonunun başlanğıcıdır. 10 mindən artıq ərazisi olan, ordusu darmadağın edilən, iqtisadiyyatı çökmüş bir dövlət güclü Azərbaycan ilə hansı mübarizəni, müharibəni apara bilər. Həmin müharibənin Paşinyan üçün hansı nəticələrə gətirəcəyi gün kimi aydındır”.
Elman Nəsirov qeyd etdi ki, Paşinyan nə qədər mənfi fikirlər səsləndirsə də, sülhdən başqa yolunun olmadığını bilir: “Ona görə də hesab edirəm ki, Paşinyan bir çox hallarda gərginliyə səbəb olacaq bəyanatlar səsləndirirsə, bu daxili audotoriya, revonşistləri sakitləşdirmək üçündür. Amma reallıqda isə çox gözəl dərk edir ki, əməkdaşlıq olmalıdır. Azərbaycanla və Türkiyə ilə əməkdaşlıq Ermənistanın nicat yoludur. Bu məntiqlə o Laçınla bağlı son mövqeyini açıqlayıb. Bu mövqe kifayət qədər konstruktiv bir mövqedir”.