“Azərbaycan Ordusu 44 günlük Vətən müharibəsində müzəffər Ali Baş Komandanının rəhbərliyi ilə yeni tarixi reallıqlar yaradıb, ölkəmizin ərazi bütövlüyünü, suverenliyini, sərhədlərimizin toxunulmazlığını bərpa edib. Bu reallığı bütün  dünya, eyni zamanda Rusiya qəbul edib”. 
Bunu açıqlamasında Milli Məclisin deputatı Elman Nəsirov deyib. 
Deputatın sözlərinə görə, bir sıra hallarda biz sülhməramlı qüvvələrin fəaliyyətində ümumi prinsiplərdən çıxmalara rast gəlirik: “Ölkə Prezidenti də öz çıxışlarında Rusiya sülhməramlılarının fəaliyyətindən prinsip etibarilə razı qalsa da, bir sıra məsələlərdə onların fəaliyyətini tənqid edib. Eyni zamanda, cənab Prezident ötən ilin iyul ayının 7-də Qarabağ və Şərqi Zəngəzur iqtisadi zonalarının yaradılması haqqında fərman imzalayıb və qeyd edib ki, qoy beynəlxalq qurumlar, beynəlxalq təşkilatlar bunu dərk etsinlər ki, artıq Dağlıq Qarabağ deyilən ərazi vahidi yoxdur. Qarabağ var, Şərqi Zəngəzur var və onlar öz çıxışlarını hazırlayarkən, çıxışlarında həmin ərazi ilə bağlı fikir söyləyərkən Dağlıq  Qarabağ deyil, məhz Qarabağ, Şərqi Zəngəzur ifadələrindən istifadə etsinlər”. 
E.Nəsirov vurğulayıb ki, görünür, bu yeniliklər Rusiya sülhməramlılarının fəaliyyətində bir qədər gec həzm olunur: “Lakin danılmaz bir həqiqət var və o həqiqəti heç nə ilə gizlətmək olmaz. Həqiqət isə ondan ibarətdir ki, artıq nə Dağlıq Qarabağ deyilən inzibati ərazi vahidi, nə də statusla bağlı məsələ var. Bu reallığın qəbul edilməsi görünür, kimlər üçünsə çətin gəlir. Amma hər şeyi zaman öz yerinə qoyur. Hesab edirəm ki, bir müddətdən sonra onların da dili öyrəşəcək və Qarabağ, Şərqi Zəngəzur deyəcəklər. Kimsə tarixin gedişatını poza bilməz”. скачать dle 12.1