“Doxtur” ləqəbli kollec direktoru bir gün mənimsədiyi milyonların əvəzini həbsxanada ödəyəcək…
O, Əli Həsənovun köməkliyi ilə Sumqayıt Tibb Kollecinin direktoru oldu…
Sumqayıt Tibb Kollecinin direktoru Rəfael Eyvazovdan söhbət düşəndə, rəhmətlik Mirzə Ələkbər Sabirin “Satıram” şeiri yada düşür:
Yaz bu elanımı da bir kağaza:
Açmışam Reydə geniş bir mağaza,
Çox ucuz qiymətə hər şey satıram,
Ay alan! Məmləkəi-Rey satıram !
....................................................
Kimə nə dəxli ki, mən şey satıram?!
Bəli, Rəfael Eyvazov deyir ki, pul qoyub Kollec açmışam, “Gündəlik-Bakı”ya nə dəxli var ki, qayıb satıram, imtahan satıram, dərs satıram, kurs sertifikatı satıram, hətta tender satıram...
Bu adam sanki satmaq üçün doğulub.
Qısa məlumat üçün qeyd edək ki, Əziz Əliyev adına Sumqayıt Tibb Məktəbi respublikanın orta tibb işçilərinə olan ehtiyacını ödəmək məqsədi ilə Ulu öndərimiz Heydər Əliyevin şəxsi təşəbbüsü ilə 1969-cu ildə yaradılmışdır.
İlk dövrlər məktəb 2 fakültə, 90 tələbə, 10 müəllimlə fəaliyyət göstərmişdir.
Səhiyyə Nazirliyinin 2010-cu il tarixli əmri ilə Sumqayıt Tibb Məktəbi Sumqayıt Tibb Kolleci adlandırılıb.
Hal-hazırda Sumqayıt Tibb Kollecində 4 ixtisas üzrə (tibb bacısı, feldşer, mama, əczaçı) kadr hazırlığı həyata keçirilir.
Son illər tələbə kontingentinin artması nəticəsində Səhiyyə Nazirliyinin və məktəbin daxili imkanları hesabına maddi-texniki bazanı möhkəmləndirmək məqsədilə korpusların sayı artırılmış, əyani vəsaitlərlə təchiz olunmuş müasir tələblərə cavab verən 4 laboratoriya, 40-dan artıq auditoriya, kitabxana, kompyuter şəbəkəsi, kompyuter otağı, müasir tələblərə cavab verən yeməkxana, avtonom istilik sistemi yaradılmışdır.
Sabiq səhiyyə naziri cənab Oqtay Şirəliyevin təşəbbüsü ilə kollecdə təkmilləşmə kursları təşkil olunmuşdur. Təkmilləşmə kurslarının keçirilməsi üçün kollecdə yeni korpus tikilmiş, müasir tələblərə cavab verən səviyyədə dinləyicilərin ixtiyarına verilmişdir.
Gördünüzmü, son illərdə dövlətin ayırdığı vəsaitin hesabına kollec üçün yeni korpuslar tikilib, müasir avadanlıqlar alınıb, hətta kollecin nəzdində TƏKMİLLƏŞMƏ KURSLARI açılıb..
Elə bil ki, bu boyda vəsaiti Rəfael Eyvazovun dədəsi-babası qoyub ki, nəvəsi pul qazansın...Vallah deyiləsi dərd deyil.
Təsəvvüvr edirsiniz, Bakıdan, Sumqayıtdan, yaxın regionlardan yüzlərlə, minlərlə tibb işçisi kollecə təkmilləşmə üçün oxumağa gəlir.
Bu tibb işçilərinin çoxunun adı kağız üzərində olur, nə kursa gəlmək, nə oxumaq...
Hamısı Rəfael Eyvazovun pulunu verib axırda təkmilləşmə kursunu bitirməklə bağlı sənəd alırlar. Vəssəlam, şüttəmam. Rəfael Eyvazov isə təkmilləşmə adı altında yüz minləri mənimsəyir.
Ümumiyyətlə, Rəfael Eyvazov hər tələbənin dərsə gəlməməsinə görə, yəni 1 qayıba görə, 5 manat alır.
Deməli, tələbənin 10 qayıbı varsa, 10 x 5 = 50 manat. İndi bu rəqəmi vurun tələbələrin sayına...
Kollecdə keçirilən imtahanların öz qiyməti var:
Kafi almaq 30 manat, yaxşı qiymət 50 manat və əla almaq 70 manat.
Bütün bunlar azmış kimi, Rəfael Eyvazov kollecə alınan avadanlıqların, inventarların satınalınılması üşün saxta tenderlər təşkil edərək, dövlət vəsaitini özünə yaxın şirkətlərə verərək, öz faizini, yəni “otkat”ını qazanır. Hətta qiymətləri şişirdərək, dövlət vəsaitini mənimsəyir.
Bəli, cənab Prezident məhz bu məsələ ilə bağlı konkret olaraq xəbərdarlıq edib:
“Əminəm ki, biz eyni həcmdə olan işi az vəsaitlə icra edə bilərik. Buna nail olmaq üçün, ilk növbədə, şəffaflıq, dövlət nəzarəti və ictimai nəzarət olmalıdır. Bütün dövlət qurumlarına deyirəm, yoxsa onlar pis öyrəşiblər. Hər ilin sonunda büdcə müzakirə olunarkən, sifarişlər göndərirlər. Özü də orada şişirdilmiş rəqəmlər öz əksini tapır, havadan götürülmüş rəqəmlər. Onlardan soruşanda ki, bu rəqəmi haradan götürürsən ? Havadan. Sonra araşdırma aparılır, görünür ki, şişirdiblər. Nəyə görə şişirdiblər? Aydın məsələdir nəyə görə. Buna da son qoyulmalıdır”.
Bəli, cənab Prezidentin xəbərdarlığına baxmayaraq direktor Rəfael Eyvazov öz əməllərini davam etdirir.
Hamı təəccüblənir ki, görəsən, cənab direktor kimə arxayındır ki, belə özbaşınalıq edir.
Deyilənlərə görə, cənab direktor arxasını xeyli vaxtdır, millət vəkillərindən birinə söykəyib. Və bu arxayınçılıq ona əlini-qolunu açmağa imkan verir.
Yeri gəlmişkən, Rəfael Eyvazov Lənkəran Dövlət Universitetində ( LDU ) prorektor olanda da arxasını Əlikram Hümbətova söykəmişdi.
Bəli, Rəfael Eyvazov 1992-ci ildə cəbhəçilərin vaxtında, daha doğrusu, Əlikram Hümbətovuin əli ilə LDU-da prorektor olub. Və rüşvətxor kimi ad çıxarıb.
Rəfael Eyvazovun başqa bir “iri dostu” da var idi.
Yəqin yaşlı nəsil Viktor Polyaniçkonu xatırlayır.
Polyaniçko 1988-1991-ci illərdə Azərbaycan Kommunist Partiyasının ikinci katibi, sonra Qarabağda təşkil olunan xüsusi komitənin başçısı olub, Əlikramla yaxın olublar.
Eyni zamanda Rəfael Eyvazov Polyaniçkonun şəxsi həkimi olub. İndi bildinizmi “doktor”un Rusiya ilə hər cürə, biznes və digər əlaqələri var.
Beləliklə LDU-da prorektor kimi çalışan Eyvazov Əlikram həbs olunanda və Polyaniçko qətlə yetiriləndən sonra özünə təzə dostlar axtarıb. Və tapıb.
Rəfael Eyvazovun təzə dostu Prezidentin o zamankı köməkçisi Əli Həsənov olub.
Beləliklə Rəfael Eyvazov yenidən vəzifə sahibi olmaq istəyib. Və onun bu arzusunu Əli Həsənov reallaşdırıb.
Beləcə, həm də Əli Həsənovla quda olan Rəfael Eyvazov Sumqayıt Tibb Kollecinin direktoru olur.
Bu gün Əli Həsənov vəzifəsindən uzaqlaşdırılsa da, köhnə dostlarının hesabına Rəfael Eyvazovu qoruya bilir.
Amma Rəfael Eyvazov unudur ki, Əli Həsənovun başı özünə qarışıb, daha Əli Həsənov onun dadına yetişə bilməyəcək və “doxtur” mənimsədiyi dövlət vəsaitlərinin bədəlini həbsxanada ödəməli olacaq. /Gundelik-baku.com/