Dövlət milyonlarla vəsait sərf edib müşahidə kameraları, radarlar quraşdırıb ki….
Yol polisi sürücünü çıxdığı yerə qədər qovmasın…
Böyük şəhərlərin, yəni meqapolislərin nəqliyyat sistemini nizamlamaq həqiqətən də dünyada ciddi problemə çevrilmişdi.
Yəni 60-70 il əvvəl olduğu kimi polis çubuğu- JEZLA ilə nəqliyyatı tənzimləmək çoxdan tarixə çevrilib.
Ona görə də, nəqliyyatın hərəkətini nizamlamaq üçün sivil ölkələr çoxdan intellektual idarəetməyə keçib.
Bunun üçün şəhərlərin küçələrində müşahidə kameraları, radarlar quraşdırılıb.
Birincisi, insan faktorunu ( rüşvət istəyə bilər, qərəzli ola bilər və s ) azaltmaq üçün bu vacib idi.
Yəni müşahidə kamerası və radarlar kimdəsə şübhə doğura bilməzdi.
Həm də nəzərə almaq lazımdır ki, hazırda nəqliyyat vasitələrinin sayı nəinki 50-60 il, hətta 10 il əvvəlki ilə müqayisə olmayacaq dərəcədə çoxdur. Və bu rəqəm getdikcə dəfələrlə artmaq üzrədir.
Ona görə də, dövlət milyonlarla vəsait sərf edərək az qala hər küçədə, hər döngədə müşahidə kamerası, radarlar quraşdırdı. Bu texniki vasitələrin zaman-zaman təmiri və yenidənqurulması dövlətə milyonlar hesabına başa gəlir.
Məqsəd ölkə vətəndaşlarının, sürücülərin rahat və problemsiz hərəkətini təmin etməkdir.
Çox təəssüf ki, bu məsələdə ölkə başçısının müsbət təşəbbüslərinə və ayırdığı dövlət vəsaitlərinə baxmayaraq yenə də yollarımızda neqativ hallar baş verir.
Yəqin ki, çoxları Ulu Öndər Heydər Əliyevin zamanında bu məsələ ilə bağlı kəskin və sərt mövqeyini xatırlayır.
Bu problem dəfələrlə Milli Məclisin tribunasından da ən kəskin formada, hətta “bu danabaşlar” şəkilində səslənib.
Yəqin ki, Milli Məclisin Komitə sədri Eldar İbrahimovun bir neçə il öncə dediklərini xatırladınız.
Amma təəssüf ki, problem nəinki bitmək bilmir, əksinə getdikcə artır, dözülməz olur.
Son illər ölkəmizin paytaxtı Bakı şəhərində yaranan dəhşətli “probka”-tıxacların da səbəbini məhz burada axtarmaq lazımdır.
Axı, nə vaxta qədər Bakı Şəhər Yol Polisi sürücünün dalınca düşüb onu saxlayacaq, yersiz sualları ilə onu bezdirəcək, vaxtını alacaq, yalandan cərimə edəcək ?
Bu nə vaxta qədər davam edəcək ?
Bəs dəyəri milyonlarla olan bu qədər texniki vasitə, radar, monitor, müşahidə kameraları nə üçün quraşdırılıb ?
Nə üçün yol polisi avtomobil sürücüsünü “çıxdığı yerə qədər” qovmalıdır ?
Birincisi, Bakı Şəhər Yol Polisinin rayon şöbələri var, sonra qəsəbələrdə yol polisi var və s.
Və ən əsası bütün bu qurumların özünə uyğun konkret DİSLOKASİYASI var.
Əgər Bakının 12 rayonunda yol polisi ilə bağlı qurum varsa, Bakı Şəhər Yol Polisi İdarəsi nəyə lazımdır ?
Nəqliyyat ekspertləri haqlı olaraq bildirir ki, 1 avtomobili saxlamaq 3 min minik vasitəsini tıxaca salmaq deməkdir. Bu isə şəhər nəqliyyatını iflic etməkdir. Başa düşdünüzmü, cənab “Bakı QAİ”sinin böyükləri ?
Ekspertlər hesab edir ki, ümumiyyətlə, paytaxtın hər rayonunda nəqliyyata nəzarət edən polis qurumu varsa, Bakı Şəhər Yol Polisi artıq qurumdur və ləğv olunmalıdır.
Bu qurumda nə qədər filankəsin bacısı oğlu, filan məmurun kürəkəni, filan deputatın oğlu və s işləməlidir. Sizin məqsədiniz həm dövlətin, həm də vətəndaşların cibinə girməkdir ?
Biz bilirik ki, Bakı Şəhər Yol Polis İdarəsində kifayət qədər savadlı, öz işinin öhdəsindən gələn ləyaqətli əməkdaşlar çalışır. Amma vətəndaşlara hər gün, hər saat problem yaradan əməkdaşlardan da qurtarmağın zamanıdır.
Nə vaxta qədər Bakı Şəhər Yol Polisi paytaxtın nəqliyyat sistemini bəzi 20 manat dalına düşənlərin “dubinka”sı ilə idarə edəcəkdir ?
Görürsünüz, biz paytaxtın rayonlarına, qəsəbələrinə məsul olan yol polisindən yazmırıq.
Problem odur ki, yol polis sistemində hər qurumun öz DİSLOKASİYA YERİ var.
Bakı Şəhər Yol Polisi hər gün, hər saat DİSLOKASİYANI pozur. Problem budur. Bu isə paytaxt yollarında dözülməz tıxaclar yaradır.
Təsəvvür edirsiniz, bütün günü Bakı Şəhər Yol Polisi cərimə yazmaq üçün bir-biri ilə yarışa çıxırlar.
Biz cərimənin əleyhinə deyilik, etdiyimiz nəqliyyat pozuntusuna görə, hətta 3 qat cərimə də ödəməyə hazırıq. Amma….
Axı, sürət və digər nəqliyyat pozuntularına görə radar və kameralar hər şeyi qeydə alır. Bəs, Bakı Şəhər Yol Polisi nə istəyir ?
Bəlkə, cərimələrə görə “mükafat” alacaqları üçün bütün günü sürücülərin dalına düşürlər ?
Biz SSRİ kimi bir imperiya dağılanda, nəhayət Azərbaycan müstəqillik əldə edəndə, bir dövlət olaraq Avropa Şurasına üzv olanda düşünürdük ki, inşallah Avropa ailəsinin üzvü olacağıq.
Cənablar! Dünya bizə baxır. Nəinki üzvü olduğumiz Avropada, heç qonşularımızda sürücünü DYP tərəfindən qovmaq deyilən biabırçılıq yoxdur.
Hətta 2 gün öncə hörmətli Daxili İşlər Nazirimiz cənab Vilayət Eyvazov xəbərdarlıq etdi ki, əsas olmadan vətəndaşı saxlamaq OLMAZ.
Təsəvvür edirsiniz problem o həddə çatıb ki, Bakı Şəhər Yol Polisinin əməkdaşları dövlət əhəmiyyətli tədbirin keçirilməsi üçün vacib olan konfidensial planı pozublar. Bunun adı rüsvayçılıqdır.
Yeri gəlmişkən, Bakı Şəhər Yol Polis İdarəsinin sözçüsü, ictimaiyyətlə əlaqələrə məsul olan şəxs Vaqif Əsədov və başının “dəstəsi” nə qədər ki oradadır, qurumun işində heç bir müsbət nəticə ola bilməz.
Vaqif Əsədov mediadakı “ucuz dostları” ilə guya problemləri aradan qaldırmaq adı altında öz bazarlığını edir.
Həm də, yeri gəlmişkən, Vaqif Əsədovun tay-tuşları çoxdan yaşla bağlı vəzifəsilə vidalaşıb.
Bəs görəsən, bu Vaqif Əsədovun qara qaşına, qara gözünə kim aşiq olub..?
Sonda cənab Prezident İlham Əliyevə, cənab nazir Vilayət Eyvazova, Baş Dövlət Yol Polis İdarəsinin rəisi Ramiz Zeynalova müraciət edərək xahiş edirik ki, paytaxt sakinlərinin canını Bakı Şəhər Yol Polis İdarəsinin zülmündən xilas edin.
P.S Etika naminə bu yaxınlarda işdən azad olan DYP işçilərinin işdən azad olunma səbəblərini yazmırıq. /Gundelik-baku.com/