Yeni Günəşli V yaşayış massivinin sakinləri istilik problemi ilə əlaqədar “MediaPost”a şikayət ünvanlayıb.
Sakinlər bildiriblər ki, artıq 3 ildir, sözügedən ərazidə bir binada bəzi evlərdə istilik olsa da, bəzilərində yoxdur və ya istilik zəifdir.
Vətəndaşlar dəfələrlə müraciət etmələrinə baxmayaraq problemin həll edilmədiyini söyləyiblər.

"Azəristiliktəchizat" ASC-nin mətbuat xidmətinin rəhbəri Rafiq Əliyev “MediaPost”a açıqlamasında problemin müxtəlif səbəblərdən qaynaqlana biləcəyini deyib:

“Qazanxanadan bütün binaya bir xətt gəlir. Ola bilsin ki, kiminsə mənzilində xətti bir tərəfdən ya bağlayırlar, ya sistemə hava düşür, ya da xətti kəsiblər. Bir binada hansısa mənzillərdə istilik yoxdursa, deməli, istilik olmayan dayaqda problem var. Ehtimal edilir ki, qonşu başqa yerə gedib, evinə su axmasın deyə radiatorun üstündəki ventili bağlayıb. Digər bir səbəb də polad boruların köhnə olması ilə bağlı ola bilər”.

R.Əliyevin sözlərinə görə, əslində, bu problemlər mənzil istismar sahələri tərəfindən araşdırılmalıdır:

“Qanunla bu məsələni binanın mülkiyyətçisi, yəni mənzil istismar sahəsi həll etməlidir. Amma bu gün mənzil istismar sahələri bunu etmədiyinə görə, abonentlərin istilik alması xatirinə biz mütəxəssislərimizi göndəririk ki, gedib onlara texniki cəhətdən dəstək olsunlar.
V massivində 31 yaşayış binası var. Yaxşı olardı ki, şikayəti olan sakinlər dəqiq ünvanı “Azəristilik” ASC-nin 956 çağrı mərkəzinə zəng vurmaqla desinlər ki, mütəxəssislərimiz gedib baxa bilsin”.скачать dle 12.1