Artıq bir ildir pandemiya səbəbi ilə şadlıq sarayları bağlıdır. Buna görə gəlir yerləri yalnız toylardan olan müğənnilər aylardır “qan ağlayırlar”.
Dünyanın inkişaf etmiş ölkələrinin müğənniləri  zəngin həyat tərzinə malikdir. Nəinki müğənnilər, buraya aktyorlar, idmançılar, şou-bizneslə məşğul olan əksər sənətçilər də daxildir. 
Bəs görəsən Azərbaycanda müğənnilərin niyə alternativ qazanc yerləri yoxdur? 
Məsələ ilə bağlı danışan Xalq artisti Səməd Səmədov qeyd edib ki, əcnəbi müğənnilər xarici ölkələrə turnelər, konsertlər təşkil edir və bundan gəlir əldə edirlər. Bizdə isə bu edilmir, nəticədə, müğənnilər toydan asılı vəziyyətdə qalırlar:
“İş burasındadır ki, xarici ölkələrdə sənətçilər turnelər, konsertlər təşkil edir, bir konsert üçün külli miqdarda pul əldə edirlər. Ancaq bizdə isə o bazar yoxdur. Bizə yaxın olan Türkiyə, Rusiyaya nəzər yetirsək görərik ki, orada tez-tez konsertlər olur. Orada müğənnilərin toylara ehtiyacı yoxdur, heç vaxt da olmayıb. Amma Azərbaycanda vəziyyət fərqlidir. Biz illərlə müharibə şəraitində yaşamışıq, ona görə bizdə konsertlər yox idi və bizim ümidimiz ancaq toylara olub. Müğənnilər həmişə  toylardan qazanıblar. İndi isə vəziyyət həqiqətən çox çətindir. Müğənnilər, musiqiçilər hamısı az qala acından ölürlər. Mən özüm təqaüdlə dolanıram. 220 manat təqaüd alıram. Heç yerdə də iş yoxdur, ümidimiz yalnız “pensiya”yadır. Mən ümid edirəm ki, pandemiya  tezliklə bitəcək, bu bəladan bütün dünya qurtulacaq”.скачать dle 12.1