Özünün Londonda 30 milyonluq mülkü, xanımının isə Bakıda 10 milyonluq restoranı olan Bayramov
Demək olar ki, hər gün mediada Gəncə Şəhər İcra Hakimiyyətinin başçısı Niyazi Bayramov haqqında şok “biznes xəbərə” rast gəlirik.
İki gün öncə Niyazi Bayramovun xanımına məxsus olan restoran aşkar edildi.
Bəli, Bakı şəhəri, Səbail rayonu, Z. Əliyeva küçəsi ev 97 ünvanında yerləşən "D'lite Restaurant & Cafe"ni icra başçısının xanımı idarə edir.
Sözügedən restoran Niyazi Bayramovun oğlu fiziki şəxs Bəhram Bayramovun adına qeydiyyatdan keçirilib.
Onsuz da icra başçılarının çoxunun biznesmen olması, milyonluq biznesi idarə etməsi heç kimə sirr deyil.
Hətta 44 günlük müharibənin getdiyi, şəhid cənazələrinin gəldiyi zaman Niyazi Bayramovun Londonda 30 milyon dəyərində mülk alması xəbəri mediada yayıldı.
Təsəvvür edirsiniz bu adam şəhidin anasını aylarla qəbul etmədiyi üçün qadın intihar etməyə məcbur olmuşdu.
İcra başçısı Londonda 30 milyona mülk ala bilir, amma şəhidin vaxtilə yaşadığı küçəyə 2 işıq dirəyi basdırmağa “imkanı yoxdur”.
Guya ki, icra başçısı Niyazi Bayramov Qarabağ veteranıdır, özü də polkovnikdir. Bundan soruşan yoxdur ki, neçənci ildə, hansı bölgədə döyüşmüsən ?
Bu adam Mingəçevir şəhərinin icra başçısı olanda Kür boyu münbit torpaqları sataraq milyonçuya çevrildi.
Niyazi Bayramovun adı bir rüsvayçı əməldə də hallanır.
Belə ki, ermənilərin atdığı raket nəticəsində Gəncədə evləri zədələnən vətəndaşlara dövlət tərəfindən verilən pulları Niyazi Bayramov mənimsəyib, hətta ev sahiblərinə 15 minə qol çəkdirib 2 min verib.
Niyazi Bayramovun icra başçısı təyin olunmağında qudası, keçmiş idman naziri mərhum Azad Rəhimovun böyük xidməti olub.
Bir neçə gün öncə o da məlum oldu ki, Niyazi Bayramov Gəncənin yollarını “kraskalamaq” üçün 5 MİLYON MANAT dəyərində “kraska” sifariş verib. Özü də tenderdə yaxın dostunu qalib elan edib.
Ümumiyyətlə, Niyazi Bayramov tenderlər vasitəsilə dövlətin milyonlarını mənimsəyir.
Bu adamdan soruşan yoxdur ki, 5 milyona “kraska” olar?
Gündəlik-Bakı olaraq Niyazi Bayramovun əməlləri ilə bağlı dərc etdiyimiz araşdırma yazılarına görə, onun şöbə müdiri Azər İbrahimov dəfələrlə redaksiyamıza zəng edərək, görüşməyi, “bazarlıq” etməyi, “problemi yoluna qoymağı” təklif edib.
Atalar yaxşı deyib ki, “Ağası Gülüm olanın...”
Bəli, Niyazi Bayramov və “komandası” bazar təfəkkürü ilə işləyirlər.
Sözün qısası, Niyazi Bayramov hər gün medianı özü ilə bağlı şok xəbərlə təmin edir.
Belə ki, Gündəlik-Bakıya daxil olan son məlumata görə, yaxın zamanda ölkəmizin Rusiya Federasiyasındakı fövqəladə və səlahiyyətli səfiri Polad Bülbüloğlu geri çağırılacaq.
Və Gəncə Şəhər İcra Hakimiyyətinin başçısı Niyazi Bayramov Polad Bülbüloğlunu əvəz edəcək.
Məlumat üçün qeyd edək ki, Polad Bülbüloğlu 16 ildir ki, səfir vəzifəsini daşıyır.
Görəsən, Mingəçeviri, Gəncəni talayan Niyazi Bayramov səfir olarsa, hansı əməlləri törədəcək?
P.S Qarşı tərəfin mövqeyini dərc etməyə hazırıq. /Gundelik-baku.com/