Müzamil Abdullayev həyatda öz savadı, istedadı və zəhməti hesabına addım-addım irəliləyib.
Gənc Abdullayev hələ sovetin vaxtında 2 ali təhsil almışdı.
1961-1966 illərdə Azərbaycan Kənd Təsərrüfatı İnstitutunu fərqlənmə diplomu ilə bitirmiş, sonra Krasnodar Politexnik İnstitutunda şərabçı-texnoloq kimi əlavə təhsil almışdır.
1967-1969-cu illərdə Kişinyov Kənd Təsərrüfatı İnstitutunun aspiranturasında oxumuş, dissertasiyasını müdafiə etmiş və kənd təsərrüfatı elmləri namizədi alimlik dərəcəsi almışdır.
Bu elə bir dövr idi ki, asan yolla alim olmaq, dissertasiya müdafiə etmək indiki kimi mümkün deyildi. Həmin dövrdə alimlik dərəcəsi almaq üçün, yüksək vəzifəyə təyinat, hökmən Moskvanın razılığından sonra həyata keçirilə bilərdi.
Bir müddət Kirovabadda ( indiki Gəncə ) şərab zavodunda baş mühəndis, sonra Mərkəzi Komitədə çalışmaq və yenidən Xanlar aqrar-sənaye şərab istehsalı zavodunun baş direktoru olmaq. Bəli bu işlər çox ciddi və məsuliyyət tələb edən məsələlərdən idi. Ulu öndərimiz Heydər Əliyev bu işlərdə məhz Müzamil Abdullayevə dəstək olmuşdur.
Yəni cavan Abdullayev həm praktiki olaraq istehsal sahələrində rəhbər vəzifələrdə, həm də Mərkəzi Komitədə indiki dillə desək siyasi işdə özünü təsdiq edirdi. Belə şəxsiyyətlərin Azərbaycanda olması Ulu Öndərimiz Heydər Əliyev üçün də uğurlu kadrların yetişməsi demək idi.
Artıq özünü həm istehsalatda-praktiki sahədə, həm də idarəetmədə təsdiq etmiş 46 yaşlı Müzamil Abdullayev hökumətdə - Nazirlər Soveti sədrinin 1-ci müavini və Dövlət Aqrosənaye Komitəsinin sədri vəzifəsinə təyinat alır.
Aqrosənaye Komitəsinin nə olduğunu bilməyənlər üçün onu qeyd edək ki, bu qurumda ölkənin xeyli sayda nazirliyi, komitələri birləşmişdi. Yəni Müzamil Abdullayevə belə bir nəhəng sahə etibar edilmişdi.
Sonradan, yəni 1993-cü ilin iyulundan 1994-cü ilin oktyabrınadək Müzamil müəllim kənd təsərrüfatı naziri vəzifəsində çalışıb.
Yəni bu insan Ulu Öndərimiz Heydər Əliyevə olan inamı, etibarı, savadı və bacariğı hesabına bu zirvəyə yüksəlib.
Müstəqillik dönəmində Heydər Əliyevin xalqın çağırışı ilə hakimiyyətə gəlməsində Müzamil Abdullayev bütün enerjisi ilə çalışıb, Ulu Öndərin siyasi xəttinin qələbəsi uğrunda qətiyyətlə mübarizə aparıb.
Həmin dövrün şəkillərinə diqqətlə baxanda bir neçə məqam diqqəti cəlb edir. Fotolarda Ulu Öndərin Müzamil Abdullayevə hörmət və ehtiramla yanaşması, ona rəğbətlə, hətta öz övladı kimi qayğı ilə baxması xüsusi olaraq diqqəti cəlb edir. Yəni Ümummilli liderin nəzərləri hər mənada Müzamil Abdullayevin üzərində olub və ona inanıb.
Amma nə etməli ki, tarixin siyasi burulğanlar dövrü olur. Müzamil müəllim də həmin dövrü yaşamalı oldu. Ancaq bu onun Heydər Əliyev dühasına hörmət və sevgisini zərrə qədər azaltmadı. Əksinə həbsxanadan çıxan kimi, yəni Heydər Əliyevin əfv fərmanından sonra Müzamil Abdullayev Ulu Öndərin Sülh üzrə Nobel mükafatı alması üçün ilk təşəbbüsü göstərib.
Təsəvvür edirsiniz, dünyanın ən böyük mükafatına.
Müzamil Abdullayev təkcə özünün əfv olunmasını deyil, Heydər Əliyevin hakimiyyəti dönəmində 50 mindən artıq insanın əfv olunmasını, öz ailəsinə qovuşmasını önə çəkib.
Müzamil Abdullayev öz təşəbbüsündə xüsusi olaraq qeyd edirdi ki, söhbət təkcə 50, 60, lap 100 min məhkumu əfv etməkdən getmir.
Heydər Əliyev 1993- cü ildə hakimiyyətə gəlməklə, Dağlıq Qarabağ döyüşlərinin ən dəhşətli vaxtında atəşkəs sazişini imzalamaqla regiona sülh gətirdi, kütləvi qırğınların qabağını aldı. Bunu həyata keçirmək böyük siyasi iradə, cəsarət tələb edirdi.
Bəli, həmin dövrdə dövlət katibi işləyən Lalə Şövkət xanım da dahi Hüseyn Caviddən misal çəkirdi:
Kəssə, hər kim tökülən qan izini,
Qurtaran dahi odur Yer üzünü.
Bütün bunları düşünərək, Müzamil Abdullayev zamanı qabaqlayaraq Ulu Öndərin Sülh üzrə Nobel mükafatına təqdim olunmasına təşəbbüsdə bulunmuşdur.
Siyasi burulğanlar arxada qaldı, hər şey öz yerini tapdı, kimin kim olduğu bəlli oldu.
Bu gün də Müzamil Abdullayev öz ağlını, savadını, bacarığını xalqımızın inkişafı və rifahı üçün sərf edir.
Və ən əsası Müzamil Abdullayev Ulu Öndəri şükranlıqla, minnətdarlıqla və sevgi ilə xatırlayır. Və onun davamçısı Müzəffər Ali Baş Komandan, Şuşa Fatehi İlham Əliyevin haqq işini ürəkdən dəstəkləyir.
