"Son günlər dünyanın bir çox ölkələrində olduğu kimi Azərbaycanda da koronavirusa yoluxanların sayında ciddi artım var. Buna havaların soyuması və həm də bununla bağlı insanların daha çox qapalı məkanlarda olmasının təsiri böyükdür".
Bu barədə Azərbaycan Tibb Universitetinin (ATU) Ağciyər xəstəlikləri kafedrasının müdiri, dosent Rafiq Bayramov bildirib.
O qeyd edib ki, koronavirus və digər infeksiyalarda xəstələnmədən qorunmanın əsas yollarından biri məhz yoluxmadan qorunmadır:
"Bu məqsədlə, hər kəs həmrəy olaraq karantin qaydalarına ciddi əməl etməli, qoruyucu maskadan düzgün istifadə etməli, ciddi ehtiyac olmadığı halda evdən çıxmamalı və qapalı, insanların sıx toplaşdığı yerlərdən kənar olmağa çalışmalıdır. Amma yaddan çıxarmamalıyıq ki, tənəffüs infeksiyalarına yoluxmaqdan qorunmaq sözlə ifadə edildiyi qədər asan deyil və bu infeksiyalara yoluxanların hamısı xəstələnmir və ya xəstələnənlərin hamısında xəstəliyin gedişi və ağırlığı eyni olmur. Burada orqanizmin fərdi xüsusiyyətlərinin (genetik, yaş, yanaşı xəstəlik və s.) rolu böyükdür".
Həkim söyləyib ki, karantin qaydalarına əməl edərək koronavirusa yoluxmadan qorunmaqla yanaşı, orqanizmin bu infeksiyaya qarşı mübarizə qabiliyyətinin də normal saxlanılması vacibdir:
"Bu məqsədlə normal gün rejimi (normal yuxu, istirahət), kəmiyyət və keyfiyyətcə normal qidalanma ( xüsusilə, Vitamin C və zülallarla zəngin qidalar - meyvə-tərəvəz, ət, balıq və s.), soyuqlamadan və stresdən qorunmaq lazımdır. Əgər hərarətin yüksəlməsi, kürəkdə ağrı, iybilmə-dadbilmə hissinin pozulması, halsızlıq, tərləmə, təngnəfəslik, öskürək və s. olarsa koronavirusa görə müayinədən keçmək lazımdır. Hər kəs unutmamalıdır ki, xəstəlik nə qədər erkən aşkar olunaraq ona qarşı doğru müalicə aparılarsa, effektivliyi bir o qədər yüksək olar".скачать dle 12.1