Ermənistanda günlərdir davam edən kütləvi etiraz aksiyalarının iştirakçıları bir tərəfdən baş nazir Nikol Paşinyanın istefasını tələb etsələr də, digər tərəfdən Rusiyanın hərbi əməliyyatlarda iştirak etməməsinə qəzəblənərək bu ölkənin rəhbərliyini tənqid edir.
Bunu aksiyalardan lentə alınmış kadrlarda da açıq-aşkar görmək mümkündür.
Vətəndaşlar çıxışlarında Rusiyanın Ermənistan və Azərbaycanı eyni zamanda silahlandırdığı fikrini irəli sürərək rəsmi Moskvanın hərbi birləşmələrini Qarabağa gətirərək döyüşməli olduğunu bildiriblər.
Aksiya iştirakçılarından biri deyir: “Düşündük ki, Rusiya ilə biz doğma respublikalarıq, bizi tək qoymaz. Lakin o, bizi tək buraxdı”.
Digər bir erməni isə Rusiyanın Ermənistanı satdığını, Paşinyanın zəif siyasətçi olduğunu deyib.
Qeyd edək ki, Rusiya Prezidentinin mətbuat katibi Dmitri Peskov “Russia Today”ə müsahibəsində Rusiyanın münaqişənin həllində Ermənistana əhəmiyyətli bir dəstək verməməsi və bəzi ermənilərin Rusiyanın mövqeyini xəyanət kimi qiymətləndirməsinə münasibət bildirmişdi: “Rusiyaya qarşı ittihamlar tamamilə əsassızdır. Rusiya KTMT-dəki məsuliyyətlərini unutmur və müttəfiqin ərazisinə, Ermənistan ərazisinə kiminsə hücum etməsi halında Rusiya təbii ki, müttəfiqini qorumaq üçün əlindən gələni edəcək”.
Xatırladaq ki, Rusiya Prezidenti Vladimir Putin qeyd etmişdi ki, Ermənistan Kollektiv Təhlükəsizlik Müqaviləsi Təşkilatının üzvüdür və bu müqavilə ilə bağlı Rusiyanın Ermənistan qarşısında müəyyən öhdəlikləri var. Amma bu məsələdə Ermənistana hüquqi yardım edə bilməzlər: “Çünki döyüş əməliyyatları Ermənistan ərazisində aparılmır”.

скачать dle 12.1