““Sputnik Azərbaycan” saytının baş redaktoru və prodüseri ilə imzalanmış əmək müqaviləsinə xitam verilib. Onların artıq Azərbaycanda fəaliyyətləri dayandırılıb. Əvvəl “RİA Novosti” Azərbaycanda bloklandı, indi isə “Sputnik Azərbaycan”a qarşı məlum addım atıldı. Suallar yaranır ki, bunun əsas səbəbləri və motivləri nə ilə bağlıdır? Azərbaycan-Rusiya münasibətləri müttəfiqlik səviyyəsinə yüksəlib. Bizim ikitərəfli və çoxcəhətli formatda münasibətlərimiz dinamik inkişaf tempinə malikdir. Siyasi dialoq yüksək səviyyədədir. Digər sferalarda da əlaqələrimizin inkişafı ilə bağlı hüquqi normativ baza formalaşıb. Azərbaycan tərəfdən atılmış addımlar heç bir halda Rusiya dövlətinə qarşı yönəlməyib. Əksinə, Rusiya dövlətini təmsil edən “RİA Novosti” və “Sputnik Azərbaycan”ın fəaliyyəti bir çox hallarda Bakı-Moskva münasibətlərinin bugünkü səviyyəsinə və perspektivlərinə xələl gətirir, ikitərəfli və çoxtərəfli münasibətlərimiz üçün əngəllər yaradır, hər iki dövlətin milli dövlətçilik maraqlarına zidd fəaliyyətlə xarakterizə olunurlar”.
 
Bu sözləri Pravda.az-a açıqlamasında Milli Məclisin deputatı Elman Nəsirov deyib.
 
O qeyd edib ki, Azərbaycan tərəfi reallıqları nəzərə alaraq məlum addımları atıb: “Bu addımları ilə həm də onu sübut etdi ki, Azərbaycan dövlətinin daxili işlərinə qarışmaq, Azərbaycanda separatizmi dəstəkləmək, konkret olaraq erməni separatizminə dəstək vermək, Qarabağdakı qondarma rejimin tör-töküntüləri üçün informasiya məkanı yaratmaq, onların terrorçu, separatçı bəyanatlarını yaymaq ikitərəfli münasibətlərimizin ümumi hüququna daban-dabana ziddir. Bu, Azərbaycanla Rusiyanın müttəfiqlik münasibətlərinə arxadan vurulmuş zərbədir. Həmçinin bu, Rusiyanın regionla, o cümlədən Azərbaycanla bağlı məlum qonşuluq siyasətinə heç bir halda uyğun gəlməyən, ona zərər vuran davranış tərzidir. Bütün bu reallıqları nəzərə alaraq Azərbaycan tərəfi siyasi gedişlərini edib. Baş verən prosesə görə məsuliyyət qarşı tərəfin üzərinə düşür. Ümid edirik, Rusiya dövləti və müvafiq qurumları hər iki mətbu orqanın münasibətlərə xələl gətirən davranışına hüquqi müstəvidə qiymət verəcək. Günhakarlar məsuliyyətə cəlb olunacaqlar”.скачать dle 12.1